पर्यटकहरुलाई नेपाली जनताको संघर्षको स्मरण गराउन गणतन्त्र स्मारक : प्रचण्ड

काठमाडौं, २४ फागुन । नेकपा माओवादी केन्द्रका अध्यक्ष प्रचण्डले गणतन्त्र स्मारकको अवलोकन गरेका छन् । गणतान्त्रिक नेपालको स्थापनाका लागि सहादत प्राप्त गर्ने सहिद, बेपत्ता नागरिक तथा अपांगता भएकाहरूको सम्मानमा स्थापना गरिएको गणतन्त्र स्मारकको अध्यक्ष प्रचण्डले अवलोकन गरेका हुन् ।

अध्यक्ष प्रचण्डले उक्त स्मारकको ऐतिहासिक महत्व भएको बताउँदै देश र विदेशका पर्यटकहरुलाई नेपाली जनताको संघर्षको स्मरण गराउने किसिमले तयार गर्नुपर्ने धारणा व्यक्त गरेका थिए ।

“यो स्मारक मेरा लागि झनै महत्वपूर्ण छ”, अध्यक्ष प्रचण्डले भने, “यसले नेपाली जनताको महान संघर्षको इतिहास चित्रण गर्दछ । हामीले हाम्रो बलिदानीपूर्ण इतिहास झल्काउने गरी यसलाई अन्तिम रूप दिनु पर्छ ।” अबलोकनको क्रममा अध्यक्ष प्रचण्डले आफ्नै नेतृत्वको सरकारले नारायणहिटी दरबार परिसरमा गणतन्त्र स्मारक निर्माण गर्ने निर्णय गरेको स्मरण गरेका थिए ।