बजार मूल्य नपाएपछि चितवनका कृषकले फलेको तरकारीमा रुँदै डोजर लगाए

माघ २३, चितवन । काठमाडौंमा तरकारीको अभाव भैरहेकाबेला चितवनका किसानहरुले् भने खेतमै तरकारी नष्ट गरेका छन । लाखौं खर्च गरी उत्पादन गरेको तरकारी बिक्री नभएपछि उनीहरुले बारीमै तरकारी नष्ट गरेका हुन ।

पूर्वीचितवनको खैरहनी–१ बहेराका किसानहरुले तरकारीको मूल्य नपाएको र बिक्री नभएको भन्दै तरकारी नष्ट गरेका छन् । उनीहरुले खेतमा लगाएको तरकारी ट्याक्टरले जोताएका छन् । तरकारीमा पनि बिशेष गरि बन्दाको मूल्य नपाएको र बिक्री समेत नभएको उनीहरुको गुनासो छ । सोमबार मात्रै खैरहनी १ बहेरामा करिब ११ कठ्ठामा लगाइएको बन्दा किसानहरुले बारीमा नै नष्ट गरिएको छ ।

तिन कठ्ठामा बन्दा उत्पादन गर्न करिब २१ हजार लागत लागेको किसान भुषाल बताउाछन ।सोहि स्थानकी नरबदा सापकोटाको दुखेसो पनि उस्तै छ । ३२ कठ्ठामा तरकारी खेती गर्दै आएकी सापकोटाले केहि दिनअघि मात्रै ब्रो काउली र बन्दा लगाएको करिब १५ कठ्ठा बारी तरकारी सहित जोताइन्् ।

केहि तरकारी त काटेर गाईभैसीलाई समेत खुवाएको तर पशुचौपायलाई समेत चिसो होला भनेर खुवाउन छोडेको उनले बताइन् । अब बाँकी रहेको १७ कठ्ठाको तरकारी पनि केहि दिनमै जोताउन पर्ने स्थिति रहेको उनले बताईन् । खैरहनी १ बहेराकै इन्दिरा भूषालले पनि ६ कठ्ठामा लगाएको बन्दा जोताइन् । अघिल्लो बर्ष डेढ लाख आम्दानी गरेकी उनले यसबर्ष एक रुपैयाँको समेत बन्दा बिक्री नगरी जोताउन परेको बताइन् ।

उनको जस्तै समस्या अहिले बन्दा लगाउने धेरै किसानहरुको छ । सोहि स्थानकी देपकला खनाल ७ कठ्ठामा लगाएको बन्दा नष्ट गर्ने तयारीमा रहेकी छिन् । सोहि स्थानका सूर्य प्रसाद भूषालले समेत दुई कठ्ठामा लगाएको बन्दा जोताए ।

अहिले चितवनमा बन्दा, काउलीको उत्पादन बढी भएकाले मूल्य नपाएको फलफूल तथा तरकारी थोक व्यवसायी संघ नारायणगढका अध्यक्ष थिर प्रसाद धितालले बताए ।

चितवनमा करिब ४६ हजार हेक्टरमा खेतीयोग्य जग्गा रहेको जसमध्ये करिब ६ हजार हेक्टरमा तरकारी खेतीहुँदै आएको छ ।