महोत्तरीमा गोली हानेर लुटपाट, एकै परिवारका पाँच घाइते
सारांश
- महोत्तरी, २३ भदाै ।
- महोत्तरीको भंगाहा नगरपालिका–६, जमुनियाँमा बन्दुक र खुकुरीले आक्रमण गरेर डकैती भएको छ।
- शुक्रबार राति २०/२२ जनाको संख्यामा आएको हतियारधारी समूहले स्थानीय अर्जुन भुजेलको घरमा डकैती गरेको हो।
महोत्तरी, २३ भदाै । महोत्तरीको भंगाहा नगरपालिका–६, जमुनियाँमा बन्दुक र खुकुरीले आक्रमण गरेर डकैती भएको छ।शुक्रबार राति २०/२२ जनाको संख्यामा आएको हतियारधारी समूहले स्थानीय अर्जुन भुजेलको घरमा डकैती गरेको हो। डाँका समूहले बन्दुक र खुकुरी चलाएर अर्जुनसहित उनका परिवारका पाँच सदस्यलाई घाइते बनाएको छ। उनीहरूले १० लाख रुपैयाँभन्दा बढीको धनमाल लुटेर लगेको पीडित परिवारले बताएको छ।
मध्यराति आएको डाँकाहरूले घरधनी अर्जुन भुजेल सुतेको कोठामा पसेर बन्दुक चलाएका थिए। डाँका कोठाभित्र पसेपछि उनीहररूलाई छलेर भाग्ने क्रममा अर्जुनका गाला र अनुहारमा उनीहरूले चलाएको बन्दुकको छर्रा लागेका छन्। कालो नकाव लगाएका डाँकाले अर्जुनकी पत्नी अञ्जुदेवी, छोराहरू दीपेन्द्र र अमित एवं साला सुमित बुढाथोकीलाई शरीरका विभिन्न भागमा खुकुरीले हानेर घाइते बनाएका छन्। घाइते पाँचै जनाको अहिले बर्दिवास-१४ स्थित शुभस्वस्तिक अस्पतालमा उपचार भइरहेको छ।
डाँकाले चार राउन्ड गोली चलाएर सानो बस्तीलाई आतंकित बनाउँदै लुटपाट गरेको घाइते अमित भुजेलले बताए। डाँकाले सुनचाँदीका गहना, धातुका भाँडा र नगदसमेत गरेर १० लाखभन्दा बढीको धनमाल लुटेर लगेको उनले बताए। घटनालगत्तै सो बस्ती र अन्य शंकास्पद ठाउँमा डाँकाको खोजी भइरहेकाे जिल्ला प्रहरी कार्यालय महोत्तरीका प्रहरी उपरीक्षक ईश्वर कार्कीले जानकारी दिए।
सम्बन्धित खबर
तपाईंले छुटाउनुभयो कि?
प्रतिक्रिया