मिसेस नेपाल वल्र्ड २०२३ को खोजी सुरु

काठमाडौं । ‘मिसेस नेपाल वल्र्ड २०२३’ हुने भएको छ । मिसेस वल्र्ड २०२३ की विजेताले अमेरिकामा चाँडै आयोजना हुने मिसेस वल्र्डमा नेपालका तर्फबाट भाग लिनेछिन् । सोही प्रतियोगितामा नेपालको प्रतिनिधित्व गर्दै पठाउन रिबन इन्टरटेनमेन्टले गत वर्षबाट मिसेस नेपाल वल्र्ड प्रतियोगिता सुरु गरेको हो ।

पहिलोपटक मिसेस नेपाल वल्र्डकी विजेताले गत डिसेम्बरमा अमेरिकामा सम्पन्न मिसेस वल्र्डमा नेपालका तर्फबाट प्रतिनिधित्व गरिन् । विवाहित नारीको सबैभन्दा ठुलो सौन्दर्य प्रतियोगिता मिसेस वल्र्डमा नेपालले आफ्नो मिसेस नेपाल वल्र्ड पठाउने अवसर गत वर्षबाट पाएको मिसेस नेपाल वल्र्डका आयोजक निशुकान्त झाले राजधानीलाई बताए । मिसेस नेपाल वल्र्डको यो वर्षको प्रतियोगिताका लागि आवेदन खुला गरिएको पनि आयोजक निशुकान्त झाले जानकारी गराएका छन् ।

‘विगत झैं यस वर्ष पनिमिसेस नेपाल वल्र्डको विजेताले अमेरिकामा हुने मिसेस वल्र्डमा नेपालका तर्फबाट सहभागिता जनाउने अवसर प्राप्त गर्नेछिन् । मिसेस नेपाल वल्र्डसँगै सोही स्टेजमा मिसेस नेपाल इन्टरनेसनल र एमएस इन्टरनेसनल उपाधि विजेता पनि चयन गरिनेछ,’ निशुकान्तले राजधानीलाई भने ।

निशुकान्तका अनुसार मिसेस नेपाल वल्र्डको विजेतालाई आगामी २०२३ को अन्तिममा अमेरिकाको लसभेगासमा हुने अन्तर्राष्ट्रिय सौन्दर्य प्रतियोगिता मिसेस वल्र्डमा नेपालका तर्फबाट प्रतिनिधित्व गर्ने अवसर मिलाइएको छ । त्यसैगरी, मिसेस नेपाल इन्टरनेसनल र एमएस इन्टरनेसनलको विजेतालाई सिंगापुरमा हुने मिसेस इन्टरनेसनलमा सहभागिताका लागि अवसर मिलाइएको छ ।

यी तीनै उपाधिको प्रतियोगिताका लागि आगामी भाद्र १६ गते नयाँबानेश्वरस्थित अर्याल इन्टरनेसनल होटलमा अडिसन हुने पनि उनले बताए ।

अडिसनबाट चयन भई प्रतियोगितामा सहभागी विवाहित सुन्दरीलाई अश्विनी झाले कोरियोग्राफी गर्नेछन् । गंगा महर्जन र सम्राट शाहको संयोजनमा हुने प्रतियोगिताको प्रशिक्षण आगामी भाद्र १८ गतेदेखि नयाँबानेश्वरस्थित अर्याल इन्टरनेसनल होटलमा हुनेछ ।