मृत्युसँग लड्नु भएको छ ? मृत्युसँग लडिरहेकी रोल्पाली चेलीलाई रोल्पालीकै साथ (समाचार शेयर गरेर तपाई पनि सहयोग गर्नुहोस्)

बाबुलाल बुढा

दाङ, १४ माघ । मृत्युसँग कोही लडेको देख्नु वा सुन्नु भएको छ ? नदेखेको वा नसुनेको भए सुनिहाल्नुस् । मृत्युसँग लडिरहेकी एक युवतीलाई मृत्युसँग लड्नकै लागि रोल्पालीहरुले साथ दिएका छन् ।

कुरा रोल्पाको कुरेली मर्बाङका २० बर्षीया मंगला पुनको हो । उनी मृत्युसँग लडिरहेका छन् यतिबेला । मृत्युसँग लडिरहेकी मंगलालाई साथ दिएका छन्, रोल्पालीहरुले । लामो समयदेखिको पेटको क्यान्सर भएर चितवनको क्यान्सर अस्पतालमा २ महिनादेखि मृत्युसँग लडिरहेकी मंगलालाई २ संस्था कुरेली समाज तथा अन्तर्राष्ट्रिय सम्पर्क मञ्चले रु ८९,४२५ र रोल्पाली ढाङढुङ सेवा समाज घोराही दाङले रु ६८,९५० रुपैयाँ गरी १ लाख ५८ हजार ३ सय ७५ रुपैयाँ आर्थिक सहयोग गरेका छन् ।

मंचका कोषाध्यक्ष इन्द्रबहादुर बुढा र ढाङढुङ समाजका कोषाध्यक्ष प्रेम बुढाले उक्त रकममध्ये केही मंगलाको बैंक खातामा र केही रकम आफन्त भीमकुमारी रोकालाई हस्तान्तरण गरेका छन् । देशविदेशमा पनि मृत्युसँग लडिरहेकी मंगलालाई सहयोग रकम जुटाएर पठाउने क्रम बढेको छ ।

क्यान्सर पीडित मंगला पुन अहिले चितवनको क्यान्सर अस्पतालमा उपचाररत छिन् । उनकी सहयोगी भीमकुमारी रोकाको भनाइअनुसार अहिले उनको स्वस्थ्यमा केही सुधार आएको छ । तर, पनि क्यान्सर जस्तो बिरामी भएकोले भन्न नसकिने अबस्था छ । मंगला पुनले अस्पतालको बेडबाट गहभरि आँसु झार्दै आफ्नो जीवनरक्षाको लागि आफन्तजन सबैसँग सहयोगको अपिल गरिरहेकी छिन् ।
गाउँमा बस्ने, त्यसमा पनि मध्यम वर्गको परिवारमा जन्मेकी स्थानीय मंगला पुनले मावि उपाबाङमा कक्षा १० सम्म पढेकी छिन् । उनी लामो समयदेखि नै बिरामी हुने गरे पनि बिस्तारै बिरामीले च्याप्दै लगेपछि मात्र स्थानीय अस्पताल हुँदै नेपालगन्जको कोहलपुर अस्पतालमा चेकअपपछि मात्र उनलाई क्यान्सर रोग भएको पत्ता लागेको थियो । उनको उपचारको लागि गाउँघरका जान्नेमान्ने राजनीति दल, संघसंस्था सबैले सहयोगको अपिल गरेका छन् ।

बुवा कृष्ण पुन र आमा बैशमाली पुनको २० बर्षीया साहिली छोरी मंगला पुन हुन् । ठूलो परिवार र निम्न वर्गको भएका कारण बुवा कृष्ण पुनले आफ्नो छोरीलाई क्यान्सर जस्तो घातक रोगको उपचार गर्ने आर्थिक हैसियत नभएकोले सहयोगको लागि विभिन्न संघसंस्थाहरुबाट सहयोगको लागि अभियान चलाउनु परेको हो । घातक रोगलाई सरकारले दिने भनेको सहुलियत रकमको औषधिको लागि पनि स्वास्थ्य कार्यालयले सिफारिस गरेको छ ।

सहयोग रकम पीडितकी आफन्त भीमकुमारी रोकालाई बुझाउँदै कुरेली समाज तथा अन्तर्राष्ट्रिय सम्पर्क मञ्चका संरक्षक कुम्भ बुढाले बाँकी प्रतिबद्धता व्यक्त गरिएको रकम पनि आउने र दोस्रो तथा तेस्रो किस्ता रकम गरेर भए पनि पीडितलाई छिट्टै हस्तान्तरण गर्ने बताएका छन् । ढाङढुङ समाज घोराहीका अध्यक्ष नारायण रोका र अन्तर्राष्ट्रिय सम्पर्क मञ्चका अध्यक्ष रामकृष्ण पुनले सहयोग गर्नुहुने सबै सहयोगीहरुलाई धन्यवाद दिएका छन् । उनले एउटी चेलीलाई बचाउन फेरि पनि सबैले सक्दो सहयोग गर्न अपिल गरेका छन् ।