मेरो बदनम गराउने समितिलाई २७ गते जवाफ दिन्छुः मन्त्री पण्डित

समितिलाई लोकसेवा आयोगले प्रकाशन गरेको विज्ञापनका विषयमा सरकारको धारणा बुझ्न दोस्रो पटक बोलाएको बैठकमा मन्त्री लालबाबु पण्डित अनुपस्थित भएपछि राज्यव्यवस्था तथा सुशासन समितिका बैठक २७ गतेसम्मका लागि स्थगीत भएको थियो । मन्त्री पण्डितले प्राइम टाइम्स टेलिभिजनमार्फत बैठकमा उपस्थित नभएको कारण सार्वजनिक गरेका छन् । समितिले आफूलाई जानकारी नगराई जबरजस्ती बैठक राखेर अनुपस्थित भएको हल्ला फिँजाएको मन्त्री पण्डितले दावी गरेका छन् ।

शुक्रबार साझँ बसेको समिति बैठकमा पनि संघीय मामिला तथा सामान्य प्रशासन मन्त्री लालबाबु पण्डित अनुपस्थित भएपछि बैठक आगामी २७ गतेसम्मका लागि स्थगित गरिएको थियो । आगामी २७ गते पनि मन्त्री उपस्थीत नभए लोक सेवा आयोगले हालै खोलेको बिज्ञापन रद्द गर्न निर्देशन दिने चेतावनी समितिले दिएको थियो ।

मन्त्री अनुपस्थितीले समितिका सांसदहरु निकै रुष्ट बनेका छन् । समितिको मत्वपूर्ण बैठकमा मन्त्री किन उपस्थित हुनुभएन भनेर हामीले लालबाबु पण्डितसँग कुराकानी गयौँ । कुराकानीका क्रममा मन्त्री पण्डितले समितिले आफूलाई जानकारी नै नगराई बैठक राखेर अनावश्यक हल्ला फिँजाएको गुनासो गरे । आफ्नो व्यस्ततालाई पनि नबुझि एकतर्फी रुपमा बैठक बोलाइएको मन्त्री पण्डितको आरोप छ ।

लोकसेवा आयोगले प्रकाशन गरेको विज्ञापनका विषयमा आफू जवाफ दिन तयार रहेको पनि मन्त्री पण्डितले बताए । प्रश्नको सामना गर्न नसकेर उपस्थित नभएको भन्ने हल्लाको खण्डन गर्दै मन्त्री पण्डितले आगाी २७ गतेको बैठकमा उपस्थित भएर त्यहाँ उठेका सबै प्रश्नको जवाफ दिने प्रतिवद्धता व्यक्त गरे ।

मन्त्री पण्डितले लोक सेवा आयोगले स्थानीय तहको लागी खुलाएको विज्ञापन विवादित बनाउनु पर्ने कुनै कारण नभएको पनि दावी गरे । विज्ञान संविधान र कानुन अनुसार नै भएको उनको जिकिर छ । विज्ञापनसम्बन्धमा सरोकार नै नभएका व्यक्तिहरुले अनावश्यक बखेडा झिकेको भन्दै उनले भर्ना प्रक्रिया रद्ध नगरिने स्पष्ट पारे ।

आयोगले दरखास्त आव्हान गर्दा समावेशी समानुपातिक प्रतिनिधित्वलाई लत्याएको भन्दै विरोध भइरहेको छ । सोही विषयमा लगातार पाँच दिनदेखि राज्य व्यवस्था समितिको बैठक बसिरहेको छ । तर मन्त्री पण्डित शुक्रबारको तीन पटकको बैठकमा नगएपछि आलोचना भएको थियो । आयोगले गत साता ५ सय १५ स्थानीय तहका विभिन्न पदका लागि ९ हजार १ सय ६१ कर्मचारी माग गर्दै विज्ञापन गरेको थियो ।