यसकारण रियल म्याड्रिडलाई ‘बाइबाई’ गर्दै रोनाल्डो

एजेन्सी, माघ ३ । सन् २०१७ मा रियल माड्रिडलाई विभिन्न उपाधि जिताउन निर्णायक भूमिका निर्वाह गर्ने विश्वचर्चित स्ट्राइकर क्रिस्टियानो रोनाल्डो रियलबाट बाहिर हुने चर्चा चलेको छ । आफ्नो खराब फर्मसँग सङ्घर्ष गर्दै आएका रोनाल्डोले आफ्नो नामअनुसारको प्रदर्शन गर्न नसकेपछि उनलाई क्लबले हेर्ने दृष्टिकोणमा परिवर्तन गरेको हो । प्राप्त जानकारीअनुसार अहिले रोनाल्डोको साटो ब्राजिलियन स्ट्राइकर नेमारलाई क्लबमा भित्र्याउन लागेको चर्चा चलेको छ ।

पछिल्लो समय ला लिगाबाट रोनाल्डोले १२ खेले पनि ४ गोल गर्न मात्र सफल भएका छन् । रोनाल्डो यही खराब फर्मलाई आत्मसात् गर्दै रियलका अध्यक्ष फ्लोरेन्टिनो परेजले नयाँ खेलाडी क्लबमा भित्र्याउने र क्लबलाई बलियो बनाउने भनेपछि रोनाल्डोलाई रियलबाट बिदा गराउन लागेको महसुस गरिएको हो । र पनि, अहिलेसम्म रोनाल्डोलाई क्लबमै राख्ने वा बिदा गर्ने त्यसबारे आधिकारिक घोषणा भने गरेको छैन ।

अध्यक्ष परेजले नेमारमाथि आँखा गाडे पनि जबसम्म रोनाल्डो रियलमा रहनेछन् तबसम्म नेमार रियलमा नआउने स्पेनिस सञ्चारमाध्यमले जनाएका छन् । पेरेज आउँदो सिजनदेखि नेमारलाई क्लबमा भित्र्याउन चाहन्छन्, तर त्यसका लागि उनी रोनाल्डोको सम्झौता सकिने समयको प्रतीक्षामा रहेका छन् ।

गत सिजनमा नेमारलाई पेरिस सेन्ट जर्मनले कीर्तिमानी २ सय मिलियन पाउन्ड खरिद गरेको थियो । नेमारले उक्त क्लबसँग सन २०२२ सम्मका लागि सम्झौता गरेका थिए । यता रोनाल्डोसँग रियलले २०२१ सम्म सम्झौता गरेको छ । स्रोतका अनुसार इस्को, मार्को असेन्सियो र दानीजस्ता फुटबलका हस्तीले रोनाल्डोको साटो रियलमा जाने इच्छा प्रकट गरेको खुलासा भएको छ । यस्तो चर्चा चलिरहेको बेलामा अब सानो क्लबमा जान नचाहने रोनाल्डोको भविष्य कस्तो होला त्यसबारे अनुमान र अड्कल काट्न मात्रै सकिन्छ ।

यस्तो अवस्थामा आगामी सिजन २०१८ का लागि खेलाडी हस्तान्तरणको प्रक्रिया शुभारम्भ भइसकेको छ । त्यसमा रोनाल्डोलाई आफ्नो क्लबमा भित्र्याउन केही क्लबले ताक लगाएर बसेको स्रोतको दाबी छ । स्रोतका अनुसार यी क्लबमा चेल्सी, पेरिस सेन्ट जर्मन, एमएल क्लब र एलए ग्यालेक्सी रहेका छन् । अब रोनाल्डो कहाँ जान चाहन्छन् त्यो उनमा निर्भर रहनेछ ।

स्पेनिस सञ्चारमाध्यमलाई आधार मान्ने हो भने यतिबेला चर्चित तीनवटा क्लब रोनाल्डोलाई साइन गर्न आतुर देखिएका छन् । जसमा चेल्सीका प्रमुख एन्टोनियो कोन्टे अन्य क्लबभन्दा अगाडि देखिएका छन् । चेल्सीको फरवार्ड लाइनलाई अझ बलियो बनाउन रोनाल्डोलाई क्लबमा भित्र्याउन लागेको कोन्टेले जानकारी गराएका छन् । रोनाल्डोलाई चेल्सीमा भित्र्याउनु अर्को कारण स्टार खेलाडी मोराटा खराब फर्ममा हुनु पनि रहेको छ । मोराटालाई अघिल्लो सिजनमा रियलबाट चेल्सी भित्र्याइएको थियो ।

त्यस्तै नेमार रियल जाने भएपछि रोनाल्डोलाई पेरिस सेन्ट जर्मनले क्लबमा भित्र्याउने जनाएको छ । किनकि यी दुई स्टारडमले गर्दा पनि सँगै एउटै क्लबमा राख्न सकिँदैन । तसर्थ दुईमध्ये एकलाई रोज्नुपर्ने पेरिसको बाध्यता छ । यदि यी दुबै क्लबसँग कुरा नमिले एलए ग्यालेक्सी रोनाल्डोसँग सम्झौता गराउन तयार रहेको छ । ग्यालेक्सीले सन् २००७ मा डेभिड बेकह्यामलाई क्लबमा भित्र्याएको थियो । यतिबेला अरू क्लबमा जाने कुरालाई रोनाल्डोले अस्वीकार नगरेको अवस्थामा अब उनी कहाँ हस्तान्तरण हुन्छन् त्यो प्रतीक्षाको विषय बनेको छ ।