विश्व प्रेस स्वतन्त्रता दिवसमा महासंघको प्रभातफेरी

काठमाडौं, २० बैशाख । नेपाल पत्रकार महासंघले विश्व प्रेस स्वतन्त्रता दिवसको अवसरमा आज प्रभातफेरी आयोजना गर्यो । “शक्तिको निगरानी ः मिडिया, न्याय र विधिको शासन” भन्ने मूल नाराका साथ बबरमहलदेखि नयाँबानेश्वरसम्म प्रभातफेरी निकालिएको हो ।

प्रभातफेरीपछि आयोजित कोणसभामा महासंघका अध्यक्ष गोविन्द आचार्यले संविधानमा प्रेस स्वतन्त्रतालाई प्रस्तावनामा नै लेखिए पनि व्यवहारमा लागू नभएको बताए । उनले नयाँ कानून बनाउन लाग्दा धेरै नै प्रेस स्वतन्त्रता हनन् गर्ने कोसिस राज्यले गरिरहेकाले त्यस्ता कानून बनाउन लाग्दा सचेत हुनुपर्नेमा जोड दिए । अध्यक्ष आचार्यले प्रेसलाई मर्यादित र जिम्मेवार बनाउनका लागि सञ्चारमाध्यमले आफैं अनुगमन गर्नुपर्नेमा जोड दिए ।

कार्यक्रममा महासंघका पूर्व अध्यक्षद्वय तारानाथ दाहाल र डा महेन्द्र विष्टले पनि सम्बोधन गरेका थिए । महासंघको काठमाडौँ शाखाले पनि भृकुटीमण्डपबाट माइतीघर, बबरमहल हुँदै नयाँबानेश्वरसम्म प्रभातफेरी गरेको थियो । महासंघका जिल्ला शाखा तथा वैदेशिक शाखाहरुले पनि आआफ्नो स्थानमा विभिन्न रचनात्मक कार्यक्रमसहित विश्व प्रेस स्वतन्त्रता दिवस मनाइरहेका छन् । आज मे ३ तारिख विश्वभर नै प्रेस स्वतन्त्रता दिवस मनाउने गरिन्छ ।