ससुराली गएर आफ्नै श्रीमतीमाथि एसिड हानेपछि…

काठमाडौं । एक पुरुषले ससुराली पुगेर आफ्नै श्रीमतीलाई एसिड प्रहार गरेका छन् । पोखरा महानगरपालिका २९ आदर्शनगर बस्ने ४७ वर्षीय वीरेन गुरूङले चितवनमा रहेको ससुरालीमै आएर श्रीमती डोल्मा रूम्बालाई एसिड प्रहार गरेका हुन् ।

एसिड प्रहारबाट घाइते रुम्बाको चितवन मेडिकल कलेजमा उपचार भइरहेको छ । उनको अवस्था सामान्य रहेको प्रहरीले जनाएको छ । बुधबार दिउसो भरतपुर धु्रवबजारस्थित माइतमा बसिरहेको बेला २० वर्षीय श्रीमती डोल्मालाई एसिड हानेका थिए ।

पोखरा बस्दै आएका वीरेनले गाडी रिजर्भ गरेर चारजना साथीसहित भरतपुर पुगी एसिड हानेको चितवन प्रहरी कार्यालये जनाएको छ । पारिवारिक मनमुटावका कारण घटना भएको प्रारम्भिक अनुसन्धानबाट खुलेको प्रहरीले जानकारी दिएको छ ।

पोखराबाट ग१य ५४३ नंको गाडी रिजर्भ गरेर एसिड हान्ने वीरेन र सँगै गएका पोखराका हेम थापा, हेटौँडाका विवेक गुरूङ र पोखराका निरेन गुरूङलाई पनि प्रहरीले पक्रेको छ । घटनाको बारेमा अनुसन्धान भैरहेको बताइएको छ ।