राष्ट्रियसभा निर्वाचन उम्मेद्वारलाई लिएर राजपाभित्र तीव्र विवाद

काठमाडौं। आसन्न राष्ट्रियसभाको निर्वाचनका उम्मेदवार चयनपछि राष्ट्रिय जनता पार्टी (राजपा) मा आन्तरिक विवाद चुलिएको छ। टिकट वितरणमा अध्यक्ष मण्डलले अपनाएको प्रक्रियालाई लिएर राजपामा विवाद चुलिएको हो।

राजपाले राष्ट्रियसभा निर्वाचनको संयोजन गर्ने जिम्मा अध्यक्ष मण्डलका संयोजक राजेन्द्र महतोलाई दिएको थियो। चार दर्जनभन्दा बढी आकांक्षीबाट अध्यक्ष मण्डलले दुईजना उम्मेदवार छनोट गरेको थियो।

अध्यक्ष मण्डलका सदस्यहरू महन्थ ठाकुर र महेन्द्रराय यादव पार्टीको निर्णयबाट असन्तुष्ट छन्। सोमबारको बैठकमा अध्यक्ष मण्डलका सदस्य यादव अनुपस्थित भए भने बैठकमा पुगेका अर्का सदस्य ठाकुर ‘तपाईंहरूलाई जे गर्नु छ गर्नुस्’ भन्दै केहीबेरमै बैठक छोडेर हिँडेका थिए।

दुईजना सदस्यले बहिष्कार गरे पनि बैठकले राष्ट्रियसभा निर्वाचनमा मत दिने आफ्ना जनप्रतिनिधिहरूलाई प्रशिक्षण दिनेलगायत निर्णय गरेको छ। पुस २७ गते मतदाताहरूसँग बर्दिबासमा बैठक गर्ने, माघ ७ र ८ गते बर्दिबासमै प्रशिक्षण, प्रदेश २ को संयोजन गर्ने जिम्मेवारी प्रदेश २ का संसदीय दलका नेता जितेन्द्र सोनललाई दिने निर्णय बैठकले गरेको थियो।

राष्ट्रियसभा सदस्यका लागि राजपाबाट मृगेन्द्रसिंह यादव र शेखर सिंहले टिकट पाएका छन् । दुवैजना सप्तरीवासी हुन् । मृगेन्द्र संयोजक महतो र शेखर अध्यक्षमण्डल सदस्य भण्डारीनिकट मानिन्छन् । राष्ट्रियसभा सदस्यका लागि टिकट पाएका मृगेन्द्र तीन पटक क्षेत्रीय प्रशासक बनिसकेका छन् ।

टिकट वितरणमा अन्य जिल्लालाई महŒव नदिइएको भन्दै राजपाभित्र विरोधको स्वर बढिरहेको छ । पार्टीले योग्य र प्रतिबद्ध नेतालाई टिकट नदिएको राजपाका कतिपय नेता–कार्यकर्ताहरूको आरोप छ ।

राजपाका कतिपय नेताले त टिकट वितरणमा पैसाको चलखेल भएको दाबी गरेका छन् । संयोजक महतो र सदस्य भण्डारीले पैसाको चलखेल गरेर टिकट बाँडेको भन्दै यस विषयमा छानबिन हुनुपर्ने राजपाका नेताहरुले माग गरेका छन्।

महतो संयोजक भएको बेला पार्टी्भित्र केही न केही गडबडी हुने गरेको कार्यकर्ताहरूको भनाइ छ । अहिले पनि महतोले विगतझैँ गडबडी गरेको उनीहरूको आरोप छ। महाधिवेशन तयारी समितिको संयोजक ठाकुर रहे पनि उनको अनुपस्थितिमा चारजना सदस्यले सोमबारको बैठकमा महाधिवेशनसम्बन्धी निर्णय गरेको राजपाका असन्तुष्ट कार्यकर्ताहरूको भनाइ छ।

पार्टीभित्रको पछिल्ला निर्णयहरूबाट पूर्व–तमलोपाका नेता कार्यकर्ताहरू आफूलाई असुरक्षित महसुस गर्न थालेका छन् । राजपाका एकजना पूर्व–तमलोपा नेताले भने, ‘पार्टी्भित्र पूर्व–तमलोपाका नेता–कार्यकर्ताको भविष्य असुरक्षित रहेको जस्तो लागेको छ। हामी पार्टी्भित्र कसरी बस्ने समस्या देखिएको छ, अरू नै बाटो खोज्ने बेला आइसकेजस्तो लागेको छ।’