भारतीय सहयोगमा कञ्चनपुरमा महेश्वर माविको नयाँ भवन निर्माण सुरु

कञ्चनपुरका बालबालिकालाई गुणस्तरीय शिक्षा र उपयुक्त शैक्षिक वातावरण प्रदान गर्ने उद्देश्यका साथ भीमदत्त नगरपालिका–१० स्थित श्री महेश्वर माध्यमिक विद्यालयको नयाँ आधुनिक भवन निर्माण प्रक्रिया सुरु भएको छ। दुई छिमेकी मुलुकबीचको सहकार्यलाई उजागर गर्दै यो शैक्षिक पूर्वाधार निर्माणको थालनी गरिएको हो।

नेपालस्थित भारतीय राजदूतावासका प्रथम सचिव बशिष्ट नन्दन र भीमदत्त नगरपालिकाका उपप्रमुख नीलम लेखक जोशीले भीमदत्त नगरपालिकामा आयोजित एक विशेष समारोहका बीच उक्त विद्यालय भवनको संयुक्त रूपमा शिलान्यास गर्नुभएको हो। भारत सरकारको आर्थिक सहयोगमा निर्माण हुन लागेको यो परियोजनाले सुदूरपश्चिमको शैक्षिक विकासमा नयाँ इँटा थप्ने विश्वास गरिएको छ।

भारतीय दूतावासद्वारा नेपालमा सञ्चालित उच्च प्रभाव सामुदायिक विकास परियोजना अन्तर्गत निर्माण हुन लागेको यो कञ्चनपुर जिल्लाकै ११औँ परियोजना हो। यस शैक्षिक पूर्वाधारको कुल लागत १ करोड ९ लाख रुपैयाँ रहेको छ। विद्यालय भवनको निर्माण कार्य स्थानीय भीमदत्त नगरपालिकामार्फत पारदर्शी र गुणस्तरीय रूपमा कार्यान्वयन हुने सम्झौतामा उल्लेख छ।

नगर उपप्रमुख नीलम लेखक जोशीका अनुसार नयाँ बन्ने यस भौतिक संरचनाले विद्यालयका विद्यार्थी र शिक्षकहरूका लागि सिकाउने र सिक्ने आधुनिक वातावरण तयार गर्न ठूलो मद्दत पुर्‍याउनेछ। उहाँले लामो समयदेखि नेपालको शिक्षा, स्वास्थ्य र सामुदायिक विकासका क्षेत्रमा भारत सरकारले पुर्‍याउँदै आएको निस्वार्थ सहयोगको उच्च प्रशंसा समेत गर्नुभयो।

नेपाल–भारत दौत्य सम्बन्ध र विकास साझेदारीको अनुपम उदाहरणका रूपमा रहेको यो परियोजना तोकिएकै समयभित्र सम्पन्न गर्ने लक्ष्य राखिएको छ।  राष्ट्रिय हित अनुकूलका यस्ता विकास निर्माणका कार्यले स्थानीय स्तरमा जनचेतना अभिवृद्धि र दुई देशबीचको जनस्तरको सम्बन्धलाई थप प्रगाढ बनाउने अपेक्षा छ।