बलिउड अभिनेत्री पूजा चोपडा पुगिन् पशुपतिनाथ, गरिन् विशेष पूजा

नेपालको प्रसिद्ध धार्मिक पर्यटकीय स्थल काठमाडौँस्थित पशुपतिनाथ मन्दिरमा बलिउड अभिनेत्री पूजा चोपडाले आइतबार विशेष पूजा, आराधना तथा दर्शन गरेकी छन्। पवित्र साउन महिनाको अवसर पारेर नेपाल आएकी उनले आराध्यदेव पशुपतिनाथको दर्शन तथा पूजाआजा गरेकी हुन्।

पशुपति क्षेत्र विकास कोषका अनुसार अभिनेत्री चोपडाले दुई हजार १०० रुपैयाँको रसिद काटेर मन्दिर परिसरमा विशेष पूजा तथा दर्शन गरेकी हुन्। मन्दिर व्यवस्थापनले धार्मिक परम्परा अनुसार नै उनको पूजाआजाका लागि आवश्यक प्रबन्ध मिलाएको थियो।

साउन महिनाको अन्तिम दिन तथा सार्वजनिक बिदा समेत परेकाले मन्दिर परिसरमा बिहानैदेखि भक्तजनको निकै ठूलो घुइँचो लागेको थियो। कोषका पुरातत्व अधिकृत सुशीलकुमार गौतमका अनुसार चोपडासहित कूल २३५ जना भक्तजनले विशेष पूजाका लागि रसिद काटेर पूजा गरेका छन्।