ऐतिहासिक मकवानपुरगढीमा पूर्वाधार विस्तार, पर्यटन प्रवर्द्धनमा जोड
सारांश
- नेपालको एकीकरण इतिहासमा विशिष्ट पहिचान बनाएको मकवानपुरगढी हाल ऐतिहासिक सम्पदा संरक्षण र पर्यटकीय प्रवर्द्धनको नयाँ मोडमा पुगेको छ।
- बागमती प्रदेशको राजधानी हेटौँडाबाट १६ किलोमिटर पूर्वमा अवस्थित यो ऐतिहासिक गढीलाई स्थानीय सरकारले पूर्वाधार विकास गर्दै प्रमुख पर्यटकीय गन्तव्यका रूपमा अघि बढाएको छ।
- वि.
नेपालको एकीकरण इतिहासमा विशिष्ट पहिचान बनाएको मकवानपुरगढी हाल ऐतिहासिक सम्पदा संरक्षण र पर्यटकीय प्रवर्द्धनको नयाँ मोडमा पुगेको छ। बागमती प्रदेशको राजधानी हेटौँडाबाट १६ किलोमिटर पूर्वमा अवस्थित यो ऐतिहासिक गढीलाई स्थानीय सरकारले पूर्वाधार विकास गर्दै प्रमुख पर्यटकीय गन्तव्यका रूपमा अघि बढाएको छ।
वि.सं. १६२२ मा तत्कालीन सेनवंशी राजा लुहाङले राज्य सुरक्षाको रणनीतिक उद्देश्यले निर्माण गरेको यो किल्ला नेपालकै सबैभन्दा ठूलो गढी मानिन्छ। सन् १७६३ मा गोर्खाली फौजले मिरकासिमका २५ सय मुगल सेनालाई परास्त गरी पहिलो वैदेशिक युद्ध जितेको ऐतिहासिक स्थल पनि यही नै हो।
इतिहास र सांस्कृतिक वैभवको संरक्षण गर्ने क्रममा गाउँपालिकाले हालसम्म करिब आठ करोड रुपैयाँ पूर्वाधारमा लगानी गरिसकेको छ। क्षेत्रलाई तारबार गरी व्यवस्थित बनाउनुका साथै आन्तरिक पर्यटकका लागि सातवटा पिकनिक सेड र सिँढी मार्ग निर्माण गरिएका छन्।
यस गढीभित्र फलामे साङ्लोले बाँधिएको कृष्ण मूर्ति रहेको प्राचीन वंशगोपाल मन्दिर, शिव मन्दिर, ऐतिहासिक दरबार र सुरक्षा संरचनाहरू मुख्य आकर्षणका रूपमा रहेका छन्। यी धार्मिक तथा ऐतिहासिक धरोहरहरूले अध्येता, कलाप्रेमी र साहित्यकारहरूलाई निरन्तर आकर्षित गर्दै आएका छन्।
स्थानीय तहले प्राचीन सामग्री सङ्कलन गरी सङ्ग्रहालय निर्माण गर्ने योजना अघि बढाएको जनाएको छ। पूर्वाधार विकाससँगै मकवानपुरगढीलाई ऐतिहासिक तथा पर्यटकीय गन्तव्यका रूपमा विकास गर्ने काम भइरहेको छ।
कुल कमेन्ट:
0
Asmita Ramtel
लेखकबाट थप
यो खबर पढेर तपाईंलाई कस्तो महसुस भयो ?
प्रतिक्रिया