मुख्य खबर

दोधारा–चाँदनी झोलुङ्गे पुल पिलरबाट चुँडिएर महाकालीमा खस्यो: आवतजावत पूर्ण ठप्प

Asmita-Newsdesk

बुधबार, आश्विन १४, २०८३

९ पटक हेरिएको

दोधारा–चाँदनी झोलुङ्गे पुल पिलरबाट चुँडिएर महाकालीमा खस्यो: आवतजावत पूर्ण ठप्प

Asmita-Newsdesk

कञ्चनपुरस्थित महाकाली नदीमाथि बनेको एसियाकै दोस्रो लामो प्रसिद्ध दोधारा–चाँदनी झोलुङ्गे पुलको बीचको भाग चुँडिएर नदीमा खस्दा आवतजावत पूर्ण रूपमा ठप्प बनेको छ।
बुधबार बिहान भीमदत्त नगरपालिका–१३ तर्फको छैटौँ र दोधारा–चाँदनीतर्फको तेस्रो पिलर जोड्ने क्षेत्रबाट पुल चुँडिएको हो।
अचानक पुलको मुख्य संरचना नै नदीमा खसेपछि सर्वसाधारणको नियमित आवागमन रोकिएको छ।

कञ्चनपुरस्थित महाकाली नदीमाथि बनेको एसियाकै दोस्रो लामो प्रसिद्ध दोधारा–चाँदनी झोलुङ्गे पुलको बीचको भाग चुँडिएर नदीमा खस्दा आवतजावत पूर्ण रूपमा ठप्प बनेको छ। बुधबार बिहान भीमदत्त नगरपालिका–१३ तर्फको छैटौँ र दोधारा–चाँदनीतर्फको तेस्रो पिलर जोड्ने क्षेत्रबाट पुल चुँडिएको हो। अचानक पुलको मुख्य संरचना नै नदीमा खसेपछि सर्वसाधारणको नियमित आवागमन रोकिएको छ।

स्थानीयका अनुसार बिहानीपख पुलका फलामका पाताहरू अस्वाभाविक रूपमा माथि उठेको देखिएको थियो। त्यसको केही समयमै पुल बीचको पिलरबाट छुट्टिएर महाकाली नदीमा खसेको प्रत्यक्षदर्शीले बताएका छन्। यस आकस्मिक दुर्घटनाले सीमावर्ती क्षेत्रका स्थानीय बासिन्दा तथा यात्रुहरू बीच ठूलो त्रास र असुविधा सिर्जना गरेको छ।

महाकाली पारिका बासिन्दालाई मूलधारसँग जोड्ने यो मुख्य झोलुङ्गे पुल क्षतिग्रस्त बनेपछि भीमदत्त नगरपालिका र दोधारा–चाँदनी जोड्ने पैदल तथा हलुका सवारी साधनको सम्पर्क विच्छेद भएको छ। दैनिक उपभोग्य वस्तुको ओसारपसार, अध्ययनका लागि जाने विद्यार्थी तथा स्वास्थ्य उपचारका लागि निस्कने बिरामीहरू प्रत्यक्ष प्रभावित भएका छन्।

पुल चुँडिएलगत्तै सम्भावित जोखिम रोक्न पुलको दुवैतर्फबाट प्रवेशमा रोक लगाइएको छ। प्राविधिक टोली तथा स्थानीय प्रशासनलाई खबर गरी पुलको वास्तविक क्षतिको मूल्याङ्कन र तत्काल मर्मतको थाल्न पहल भइरहेको छ।

वर्षौँ पुराना भौतिक पूर्वाधारको समयमै मर्मतसम्भार र नियमित निरीक्षण नहुँदा यस्ता जोखिमपूर्ण घटना दोहोरिने गरेका छन्। स्थानीय तह तथा सम्बन्धित निकायले तत्काल वैकल्पिक आवागमनको व्यवस्था मिलाउन र पुलको पुनर्निर्माणलाई प्राथमिकताका साथ अघि बढाउन माग गरिएको छ।