जम्मू–कश्मिरमा राजनीतिक संकट, त्रासमा जनता

बीबीसी। भारत प्रशासित जम्मू कश्मिरको राजधानी श्रीनगरमा सोमबार मध्य रातिदेखि नाटकीय रुपमा राजनीतिक घटनाक्रम परिवर्तन भएको छ। नेशनल प.कन्फ्रेन्सका नेता उमर अब्दुल्ला, पीडीपी अध्यक्ष महबुबा मुफ्ती र जम्मू कश्मिर पिपुल्स कन्फ्रेन्सका अध्यक्ष सज्जाद लोनलाई उनीहरुको घरमा नै नजरबन्द गरिएको छ। श्रीनगरमा रहेका पत्रकार माजिद जहाँगीरले ती नेतालाई नजरबन्दमा राखिएको पुष्टि गरे।

उनका अनुसार पूरै श्रीनगरमा धारा १४४ लगाइएको छ, जुन अर्को आदेश जारी नहुँदासम्म लागू हुनेछ। यो आदेश अनुसार जनतालाई कुनै पनि प्रकारको स्वतन्त्रता हुँदैन भने सबै शिक्षण संस्था पनि बन्द हुन्छन्। यसैबीच श्रीनगरसहित पूरै कश्मिरमा मोबाइल र इन्टरनेट सेवा पनि बन्द गरिएको छ। यसअघि उमर अब्दुल्लाले एक ट्विट गर्दै आफूलाई नजरबन्द गरिन सक्ने आंशंका गरेका थिए।

उमर अब्दुल्लाले आफ्नो ट्विटमा लेखेका थिए–मलाइ र अन्य नेतालाई नजरबन्द गर्ने प्रक्रिया सुरु गरिएको छ। यसका कारण थाहा पाउने कुनै तरिका छैन।’ उमर अब्दुल्लाको ट्विटको जवाफमा कांग्रेस नेता एवं पूर्व केन्द्रीय मन्त्री शशि थरुरले एउटा ट्विट गर्दै उनको समर्थन गरेका छन्। उता पीडीपी नेता महबुबा मुफ्तीले पनि एक ट्विट गर्दै कश्मिरका लागि एकजुट हुने बताएकी छन्।

महबूबा मुफ्तीले आफ्नो ट्विटमा भनेकी छन्–अवस्था सहज छैन। तर कसैले पनि हाम्रो प्रतिवद्धतालाई तोड्न सक्दैन।’ कश्मिरको जारी राजनीतिक घटनाप्रति अर्गनाइजेशन अफ इस्लामिक कन्ट्रीज (ओआईसी) ले पनि चिन्ता जनाएको छ। ओआईसीले आफ्नो ट्विट गर्दै भनेको छ–भारत नियन्त्रित कश्मिरको अवस्था, अतिरिक्त सुरक्षाकर्मीको तैनाथी तथा प्रतिबन्धित क्लस्टर बमको प्रयोगको खबरले हामीलाई चिन्तित बनाएको छ।’