ट्रम्पको भाषणको प्रति सभामुखले संसदमा नै च्यातिन

वासिंटन, माघ २३ । अमेरिकी राष्ट्रपति डोनाल्ड ट्रम्पले देशको संसद् कंग्रेसलाई गरेको सम्बोधनमा ‘महान् अमेरिकी पुनर्जागरण’को प्रशंसा गरेका छन्। तर, त्यसक्रममा अमेरिकी राजनीतिको उच्च तहमा कडा विभाजन विद्यमान रहेको छर्लंग भएको छ। वार्षिक स्टेट अफ द युनियनको भाषणका क्रममा बोल्दै ट्रम्पले आगामी चार वर्षे कार्यकालका लागि आफ्नो योजनासमेत प्रस्तुत गरेका छन्।

राष्ट्रपतिको सम्बोधन भ्रष्टाचारको आरोपमा उनीविरुद्ध चालिएको महाभियोग प्रक्रियाबाट उनले सफाइ पाउने अनुमान गरिएको एक दिनअघि आएको हो। वार्षिक भाषण कार्यक्रमको एक चरणमा संसद्को तल्लो सदनकी डेमोक्रे्याटिक सभामुख न्यान्सी पेलोसीले राष्ट्रपतिको भाषणको एक प्रति उनकै पछाडि बसेर च्यातेकोसमेत देखिएको थियो।

रिपब्लिकन राष्ट्रपतिले मंगलबार बेलुकीको सम्बोधन डेमोक्रे्याटिकहरूको बहुमत रहेको सदनमा गरेका थिए, जहाँ गत डिसेम्बरमा उनीविरुद्धको महाभियोग प्रस्ताव पारित भएको थियो। उक्त महाभियोग प्रस्तावले बुधबार अमेरिकी संसद्को माथिल्लो सदन सिनेटमा अन्तिम स्वरूप लिनेछ। तर, त्यहाँ रिपब्लिकनहरूको बाहुल्य भएकाले उक्त प्रस्ताव असफल हुने लगभग पक्का देखिएको छ र उनी पदबाट बर्खास्त हुनबाट जोगिने छन्।

आफ्नो सम्बोधनका क्रममा राष्ट्रपति ट्रम्पले आफूविरुद्धको महाभियोगका बारेमा केही पनि बोलेनन्। अमेरिकामा संसदीय प्रचलन अनुसार राष्ट्रपतिले आफू बहाल रहेको हरेक क्यालेन्डर वर्षको आरम्भतिर कंग्रेसलाई सम्बोधन गर्ने गर्छन्। त्यस्तो भाषणलाई राज्यहरूको गठबन्धनको ताजा अवस्थाबारे राष्ट्रपतिले जनप्रतिनिधिलाई गराउने जानकारी अर्थात् स्टेट अफ द युनियन भन्ने गरिन्छ।

उक्त भाषणमा राष्ट्रपतिले विधायनसम्बन्धी आफ्ना एजेन्डा र अन्य राष्ट्रिय प्राथमिकताका विषयका बारेमा पनि प्रस्तुत गर्ने गर्छन्। चार महिनाअघि ह्वाइट हाउसमा भएको बैठकबाट बीचमै उठेर उनी बाहिरिययता न्यान्सी पेलोसी र राष्ट्रपति ट्रम्पबीच देखादेख भएको यो पहिलो पटक थियो।

सम्बोधन गर्न मञ्चमा जानुअघि न्यान्सी पेलोसीले मिलाउन अघि सारेकी हात राष्ट्रपति ट्रम्पले देखेको नदेखेझैँ गरेर बेवास्ता गरिदिएका थिए। राष्ट्रपतिले उनको सम्बोधन अन्त्य गर्दै गर्दा पेलोसीले राष्ट्रपतिको सम्बोधनको प्रतिलिपिलाई च्यातेकी थिइन् र त्यो दृश्य देख्नेहरू स्तब्ध भएका थिए। तर, उनले एकभन्दा बढी पटक आफ्नो आसनबाट उठेर राष्ट्रपतिका लागि ताली भने बजाएकी थिइन्।

बीबीसीका अनुसार एक घन्टा अठार मिनेट लामो सम्बोधनका क्रममा राष्ट्रपति ट्रम्पले सकारात्मक प्रस्तुति दिएका थिए। उनले आफ्ना पूर्ववर्ती बराक ओबामाको कार्यकालको आलोचना गरेका थिए।