देउवासँग तर्क गर्नु भनेको कर्कला काट्न बन्चरो प्रयोग गर्नु जस्तै हो : केपी ओली

Abhiyanpost Abhiyanpost
|
मंगलबार, कार्तिक २८, २०७४
|
६
|
५४ पटक हेरिएको
Shares
देउवासँग तर्क गर्नु भनेको कर्कला काट्न बन्चरो प्रयोग गर्नु जस्तै हो : केपी ओली

सारांश

  • प्रतिनिधी सभा सदस्य र प्रदेशसभा सदस्यका लागि हुन लागेको चुनावको मुखमा सबैजसो राजनीतिक दलहरु आफ्ना एजेण्डा जनतासमक्ष पु¥याउन कसरत गरिरहेका छन् ।
  • विशेषगरी लोकतान्त्रिक गठबन्धन र वाम गठबन्धनबिच जनमत बटुल्नका लागि कडा प्रतिस्पर्धा भइरहेको छ ।
  • वाम गठबन्धनले बहुमत ल्यायो भने कम्युनिष्ट शासन प्रयोग हुन्छ भन्ने आरोप कांग्रेसको छ भने कांग्रेसले देश विकास गर्न सकेन भन्ने आरोप एमाले–माओवादीको छ ।

प्रतिनिधी सभा सदस्य र प्रदेशसभा सदस्यका लागि हुन लागेको चुनावको मुखमा सबैजसो राजनीतिक दलहरु आफ्ना एजेण्डा जनतासमक्ष पु¥याउन कसरत गरिरहेका छन् । विशेषगरी लोकतान्त्रिक गठबन्धन र वाम गठबन्धनबिच जनमत बटुल्नका लागि कडा प्रतिस्पर्धा भइरहेको छ । वाम गठबन्धनले बहुमत ल्यायो भने कम्युनिष्ट शासन प्रयोग हुन्छ भन्ने आरोप कांग्रेसको छ भने कांग्रेसले देश विकास गर्न सकेन भन्ने आरोप एमाले–माओवादीको छ । यिनै विषयवस्तुको सरोफेरोमा रहेका पत्रकार ऋषि धमलाले एमाले अध्यक्ष केपी शर्मा ओलीसँग अन्तरवार्ता लिएका छन् । नेपाली रेडियो नेटवर्कको कार्यक्रम नेपाली बहसका लागि लिइएको अन्तरवार्ताको सम्पादित अंश यहाँ प्रस्तुत गरिएको छ ।

वाम गठबन्धन केका लागि हो ?
पहिलो कुरा त आजको राष्ट्रिय राजनीतिको आवश्यकता के हो भन्ने कुरा महत्वपूर्ण छ । राजनीति भनेको देश बनाउने माध्यम हो । केटाकेटीको खेल होइन । देशमा लोकतान्त्रिक पद्धति लागु गर्दै आर्थिक समृद्धि नै अबको राजनीतिक यात्रा हो । जनताका सपनालाई साकार बनाउनका लागि संविधान कार्यान्वयनलाई पहिलो प्राथमिकतामा राख्नुपर्ने अवस्था छ ।
आज सही नीतिहरुका साथ देशलाई एकताका साथ अगाडि बढाउने र फराकिलो लोकतन्त्रको बाटोमा लैजानुपर्ने खाँचो छ । त्यसका लागि एमाले र माओवादीले स्थायी सरकार बनाउनका लागि यो चुनावी तालमेल गरेको हो । एकतातर्फ उन्मुख भएको छ ।

चुनावी नतिजा कस्तो आउला ?
अरु धेरै कुरा म भन्न चाहन्न । आरामदायी बहुमत आउँछ । सबै राजनीतिक दल, वुद्धिजीवी, नेता तथा जनतालाई के भन्न चाहन्छु भने तालमेलले आरामदायी बहुमत ल्याउँछ । स्थिर सरकार दिन्छ । त्यस्तो सरकार किन बनाउने धाक लगाउन हो ? अहङ्कार देखाउनका लागि हो ? अथवा भ्रष्टाचार गर्नका लागि हो ? देश र जनताको आवश्यकता पूरा गर्नका लागि र देशलाई समृद्धिको बाटोमा लैजानका लागि स्थिर सरकार बनाउने कुरा गरिएको हो । कोही नझस्किए हुन्छ ।
तपाईहरुको सरकार आयो भने त कम्युनिष्ट नीति लागु हुन्छ र जनताले रुन पनि पाउँदैनन् भन्ने आशंका प्रधानमन्त्री शेरबहादुर देउवाले गर्नुभएको छ नि ?
नेपालमा कम्युनिष्ट सरकार आउँछ । बन्नुपर्छ । कम्युनिष्ट शासन र व्यवस्था आउनुपर्छ र नेपाल बन्छ । नेपाललाई भ्रष्टाचारबाट मुक्त गर्नका लागि लोकतान्त्रिक प्रणाली चाहिन्छ । लोकतन्त्र भनेको कम्युनिष्ट व्यवस्था हो । कम्युनिष्टहरु लोकतन्त्रका लागि लडेका छन् । लोकतन्त्र भनेको के हो कम्युनिष्टहरुलाई थाहा छ । कम्युनिष्ट व्यवस्था भनेको समानता र न्यायको व्यवस्था हो । लोककल्याणकारी राज्यको व्यवस्था हो । राज्य भनेको जनताका लागि जनताद्धारा निर्वाचित जनताको सेवक संयन्त्र हो । यो कुरा नेपाली कांग्रृसले बुझ्न जरुरी छ ।

प्रधानमन्त्री देउवाले त लोकतन्त्रका लागि कांग्रेसलाई मतदान गर्नुपर्छ भन्नुभएको छ नि ?
उहाँले आधा बुझ्नुभयो । कम्युनिष्ट सरकार आउँछ भन्ने बुझ्नुभयो । तर लोकतन्त्रसहितको कम्युनिष्ट सरकार भन्ने बुझ्नुभएन । उहाँको जस्तो भ्रष्टतन्त्र, लुटतन्त्र जस्तो लोकतन्त्र हामीले भनेको होइन । हामी पनि लोकतन्त्रका लागि नै संघर्ष गरिरहेका छौँ । हामी लोकतन्त्रका लागि लड्ने, हामी संविधान ल्याउने, हामी संघर्ष गर्ने, जेलनेल बस्ने । अरुले ल्याइदिएको लोकतन्त्रमा मैले पो गरेँ भनेर कांग्रेसले दाबी गरेको छ ।

कम्युनिष्टहरुको रणनीति भनेको लोकतन्त्रलाई समाप्त पार्ने हो भनेर देउवाले आरोप लगाउनुभएको छ नि ?
प्रधानमन्त्री देउवाले आजको दुनियाँको अध्ययन गर्नुभए हुन्थ्यो । उहाँलाई फुर्सद छैन होला । म के भन्न चाहन्छु भने २१आँै शताब्दीमा हावादारी कुरा गरेर हुँदैन । नेपाली कांग्रेसका प्रधानमन्त्रीज्यू लगायतका नेताहरुलाई के भन्न चाहन्छु भने लोकतन्त्रका निम्ती गरिएको संघर्षमा र त्यसप्रतिका निष्ठामा हामीसँग तुलना हुन सक्दैन । कोही नेता छ भने बहसका लागि आए हुन्छ ।

एमाले र माओवादीबिचमा पार्टी एकता भएपछि नेपालमा साम्यवाद सुरु हुन्छ कि लोकतन्त्र स्थापित हुन्छ ?
साम्यवादको हल्ला अनौठो र अचम्म तरिकाले यतिबेला चल्यो । चुनाव हुँदैछ, कता साम्यवादको कुरा आयो ? डराउनुको पनि हद हुन्छ नि । पाँच वर्षपछि अर्को चुनाव हुन्छ । संविधान छ । कति हतास मनस्थिती हो ? बच्चाबच्चीले खुट्टा बजारेर पनि यस्तो रुवाबासी गर्दैन । कांग्रेस जस्तो पुरानो पार्टीलाई यस्तो गर्न सुहाउँदैन ।

तपाईहरुको बहुमत आयो भने नेपाललाई उत्तर कोरिया र कम्बोडिया जस्तै बनाउनुहुन्छ भन्ने आशंका गरिएको छ नि ?
शेरबहादुर देउवाजिले कम्युनिष्ट भन्ने वित्तिकै उत्तर कोरिया देख्नुहुन्छ भने गैर कम्युनिष्टलाई मार्कोस किन नदेख्ने ? सद्दाम हुसेन किन नदेख्ने ? त्यसकारण स्वस्थ प्रतिस्पर्धामा उत्रिए हुन्थ्यो । देउवासँग गुदी पनि छैन, देउवासँग तर्क गर्नु भनेको कर्कला काट्न बन्चरो प्रयोग गर्नु जस्तै हो ।
हामीले समाजवादतर्फ जाने भनेका छौँ । अहिले साम्यवादको बेला र परिस्थिती होइन । कांग्रेस अन्तराष्ट्रिय समाजवादी संस्थाको सदस्य छ । तर समाजवाद भन्दा तर्सिन्छ । संस्थाको सदस्यबाट राजिनामा किन गर्दैन ? कांग्रेसले भन्छ, झण्डामा भएको चार तारामध्ये एउटा चाँही समाजवाद हो । राष्ट्रियता, प्रजातन्त्र, समाजवाद के जाती…तर समाजवाद भन्दा तर्सिने हो भने झण्डाको एउटा तारा निकाल्नुप¥यो नि । विपिको सिद्धान्त मान्छु भन्नेले समाजवाद मान्नुप¥यो नि । नेपालमा आफ्नै प्रकारको समाजवाद ल्याउनुपर्छ ।

वाम गठबन्धनले घोषणापत्रमा समावेश गरेका विकास निर्माण र आर्थिक समृद्धिको योजना कति वर्षमा पूरा हुन्छ ?
योजना अनुसार १ वर्ष, २ वर्ष, ५ वर्ष, १० वर्ष वा जति वर्षको योजना छ, त्यस अवधिमा सबै योजना सफल हुन्छ । नेपाललाई आधुनिक र विकसित राष्ट्र बनाउँछाँै । संयुक्त राष्ट्रसंघले भन्छ, दिगो विकास । हामी पनि त्यो कुरा मान्छौँ । तर हामी दिगो विकास होइन, द्रुत विकास गर्न चाहन्छौँ । नेपाल उर्वर भूमि हो । त्यसैले हामीले प्रस्तुत गरेका योजना सबै सम्भव छन् ।

योजना साकार पार्न सक्ने आधार केके छन् ?
रोजगारीका अवसर सृजना गरेर देश बाहिर गएका ४० लाख युवालाई स्वदेश फर्काउन सकिन्छ । युवाहरुलाई देश बनाउने अभियानमा सहभागि गराउँछौँ । जलविद्युत, यातायात, संचार, पर्यटन, कृषि, उद्योग लगायतका क्षेत्रलाई बढाएर समृद्ध देश बनाउन सकिन्छ । यो काम गर्न सक्यौँ भने हामी छिटै देश विकास गर्न सक्छौँ । सबै जनतामा समान अधिकार र अवसर दिलाउँछौँ । यही कुरालाई साम्यवाद भनेको हो ?

विकास त कांग्रेसले पनि गर्छु भनेको छ नि ?
कांग्रेस रित्तो भइसक्यो । कांग्रेससँग नीति छैन, विचार छैन । धानको बाला ठूलो फाउनुपर्छ भन्ने सोच छैन । नचाहिने कुरामा सर्टिफिकेटवाला वुद्धिजीवीहरु प्रयोग गरेर चुनावलाई प्रदुशित गर्न खोजेको छ । कुनै बेला ६० वर्ष काटेकालाई एमालेले गोली ठोक्छ भनेर हल्ला चलायो । यही एमालेले वृद्धभत्ताको व्यवस्था ग¥यो । कांग्रेसले त नेपाली जनताका लागि होइन, अरु कसैका लागि संविधान संशोधन गर्छु भनिरहेको छ । हामी त जनताको हितका लागि काम गर्दैछौँ । संविधान संशोधनको पक्षमा एमाले पनि छ, तर नेपाली जनताको अहित हुने गरी हामी संविधान संशोधन गर्न सक्दैनौँ ।

प्रत्यक्ष निर्वाचित राष्ट्रपतिय प्रणालीमा किन जान खोज्नुभएको ?
प्रत्यक्ष निर्वाचित राष्ट्रपति भयो भने अलोकतान्त्रिक हुन्छ ? नेपाली कांग्रेसका नेताहरुलाई म विचार गरेर बोल्न आग्रह गर्छु । अमेरिकाको राष्ट्रपतीय प्रणाली लोकतान्त्रिक हो कि होइन ? तर मैले राष्ट्रपतीय प्रणाली भनेकै छैन ।

प्रत्यक्ष निर्वाचित राष्ट्रपतीय प्रणाली निरङ्कुश हुन सक्दैन ?
निरङ्कुश त अहिले भएन ? प्रधानमन्त्री देउवाले निर्वाचन आचारसंहिता मान्नुभएको छ ? सक्नुभयो भने उहाँले जे पनि गर्नुहुन्छ ? पायो भने उहाँ तानाशाह बन्नुहुन्छ, सकेन भने जो भेट्नुहुन्छ त्यसलाई चढाइदिएर भागेर हिँड्नुहुन्छ । हामी त लोकतान्त्रिक मूल्य र मान्यताअनुसारको शासन व्यवस्था चाहन्छौँ । हामी लोकतान्त्रिक बन्नका लागि कांग्रेससँग सर्टिफिकेट लिनु पर्दैन ।

नेपालका कम्युनिष्टलाई लोकतान्त्रिकरण गर्ने हामी हौँ भनेर कांग्रेसका नेताहरुले भन्छन् नि ?
कांग्रेस आफै लोकतान्त्रिकरण भएको छैन । एमालेजस्तो लोकतान्त्रिक पार्टी छ कांग्रेस ? अरुलाई लोकतान्त्रिक बनाएँ भनेर हुन्छ ?

प्रतिक्रिया

6 कमेन्ट

    Comment Author

    Dipendra KC

    पढाइ गुनाई कैडी काम हलो जोती खाए माम के पी ।

    Comment Author

    Raju Sth

    बम बनौनी संगै मील्नु न पछी प्रचण्ड ले आफू लाई पनि उदौला होस गर्नु है

    Comment Author

    Kapil Bhatta

    Khai kaka.k.ho.k

    Comment Author

    Madan Rokaya

    अाेलिकाे कस्ताे छत

    Comment Author

    Madan Rokaya

    बिदेशि अाैषधि खाने देशका कुरा गर्ने

    Comment Author

    Khimananda Acharya

    Haha…….

कमेन्ट लेख्नुहोस्

तपाईंको इमेल ठेगाना प्रकाशित हुनेछैन। आवश्यक फिल्डहरू चिन्ह लगाइएका छन् *

कुल कमेन्ट: 6
यो खबर पढेर तपाईंलाई कस्तो महसुस भयो ?

तपाईंले छुटाउनुभयो कि?