नागार्जुनको बजेट सार्वजनिक…
सारांश
- काठमाडौँ, ३० असार ।
- नागार्जुन नगरपालिकाले रु ६४ करोड ७२ लाख ९० हजारको बजेट सार्वजनिक गरेको छ ।
- नगरपालिकाले आर्थिक वर्ष २०७४÷७५ का लागि उक्त रकम बराबरको नीति, कार्यक्रम तथा बजेट सार्वजनिक गरेको हो ।
काठमाडौँ, ३० असार । नागार्जुन नगरपालिकाले रु ६४ करोड ७२ लाख ९० हजारको बजेट सार्वजनिक गरेको छ ।
नगरपालिकाले आर्थिक वर्ष २०७४÷७५ का लागि उक्त रकम बराबरको नीति, कार्यक्रम तथा बजेट सार्वजनिक गरेको हो । चालू खर्च रु २१ करोड ६९ लाख ९० हजार, पूँजीगत खर्च रु २३ करोड ५३ लाख, समपूरक कोष रु चार करोड ५० लाख र नपा तथा वडाका भवन निर्माणतर्फ रु १५ करोड बजेट रहेको छ ।
नीति, कार्यक्रम तथा बजेट सार्वजनिक गर्दै नेपाली काँग्रेसका नेता प्रकाशमान सिंहले देशमा राजनीतिक स्थिरता कायम हुँदै गएकाले अब विकास गर्नका लागि प्रत्येक स्थानीय तहले योजना बनाउनुपर्ने बताउनुभयो । उहाँले भन्नुभयो – “तपाईंहरु जनताको भोटबाट जितेका प्रतिनिधि हुनुहुन्छ, जनताको चाहना र भावनालाई प्राथमिकतामा राखेर काम गर्नुहोस् ।”
नेता सिंहले नगरपालिकाको विकासका लागि गुरुयोजना तयार गरेर अगाडि बढेमात्र विकास हुुने भन्दै नगरपालिका विकासकोे गुरुयोजना बनाउन आग्रह गर्नुभयो ।
सांसद ध्यानगोविन्द रञ्जितले नगरपालिकाका लागि छुट्याएको बजेट सही ठाउँमा प्रयोग गर्नुपर्ने बताउनुभयो । उहाँले साउन १ गतेदेखि नै बजेट लागू हुने भन्दै विकासको काममा ढिला नगर्न आग्रह गर्नुभयो ।
नगरपालिकाका प्रमुख मोहनबहादुर बस्नेतले विपन्न परिवारका लागि व्यापार व्यवसाय सञ्चालनका लागि नगरपालिकाको बजेटले विशेष कार्यक्रम ल्याएको बताउनुभयो । उपप्रमुख सुशीला अधिकारीले नगरपालिकालाई नमूना नगरपालिका निर्माण गर्नेगरी नीति तथा कार्यक्रम प्रस्तुत गरेको बताउनुभयो । नीति तथा कार्यक्रममा वातावरणमैत्री नगरपालिका निर्माण, फोहरमैला व्यवस्थापन, सडक सौर्यबत्ती जडानलगायत कार्यलाई उच्च प्राथमिकता दिइएको छ ।
यस्तै सुशासन कायम, स्विजरल्याण्ड पार्क व्यवस्थापन, महिला विद्यालय, ज्येष्ठ नागरिक दिवा विश्रामस्थल निर्माण, बढी कर तिर्ने करदातालाई प्रोत्साहन, होमस्टे सञ्चालनलगायत कार्यलाई नीति तथा कार्यक्रमले प्राथमिकता दिएको छ ।
प्रतिक्रिया