नेकपाका नेताद्वारा पार्टीको कुनै पनि जिम्मेवारीमा नबस्ने घोषणा

काठमाडाै, १२ असार ।  सत्तारुढ नेकपाका नेता हितमान शाक्यले पार्टीको कुनै पनि जिम्मेवारीमा नबस्ने घोषणा गरेका छन् । उनले पार्टी अध्यक्षको फोनसमेत उठाउन छाडेको नेताहरु बताउँछन् ।

एकीकृत पार्टीको स्थायी कमिटीमा नपरेपछि पार्टी एकता प्रक्रियामा असन्तुष्टि जनाउँदै उनले बैठकहरुमा उपस्थित हुन छाडेको प्राप्त समाचारमा जनाइएको छ l

तत्कालीन एमाले र माओवादीबीच जेठ ३ गते एकता भए पनि प्रदेशस्तरमा र जनवर्गीय संगठनस्तरमा भने एकता भइसकेको छैन । अहिले एकताको लागि कार्यदलस्तरमा छलफल जारी छ । यही क्रममा सोमबार अनेरास्ववियु र अखिल क्रान्तिकारीको एकता कार्यदलको पहिलो बैठक बसेको थियो । तर, बैठकमा कार्यदल सदस्य एवम् तत्कालीन माओवादी विद्यार्थी संगठनको फ्रयाक्सन इन्चार्ज हितमान शाक्य नै उपस्थित भएनन् ।

बैठकमा कार्यदल सदस्यहरु तत्कालीन एमाले विद्यार्थी फ्रयाक्सन इन्चार्ज रविन्द्र अधिकारी, अनेरास्ववियु अध्यक्ष नविना लामा र अखिल क्रान्तिकारीका अध्यक्ष रञ्जित तामाङ मात्र उपस्थित थिए । त्यसपछि हितमानको सट्टा अर्को नेतालाई कार्यदलमा पठाइदिन नेकपालाई पत्र लेख्ने निर्णय गर्दै बैठक स्थगित गरिएको थियो ।

अखिल क्रान्तिकारीका अध्यक्ष तामाङले भने, ‘हितमान दाइ बैठकमा उपस्थित हुन असमर्थ रहेको जानकारीमा आएकाले उहाँको स्थानमा अर्को कुनै कमेरडलाई कार्यदलमा पठाइदिन पार्टी केन्द्रलाई अनुरोध गर्ने निर्णय गरेका छौं ।’

यसअघि हितमानलाई तीन नम्बर प्रदेशको पार्टी एकता कार्यदलमा पनि राखिएको थियो । तर, उनी बस्न नमानेपछि हाल अग्नि सापकोटालाई राखिएको छ ।

स्रोतका अनुसार हितमान नेकपाको स्थायी समितिमा नपारिएको भन्दै नेतृत्वसँग असन्तुष्ट छन् । आफू सँगैका नेताहरु सबै स्थायी समितिमा परे पनि आफूलाई नराखिएको उनको गुनासो छ । नेतृत्वसँग रुष्ट भएका उनले पार्टीको कुनै पनि जिम्मेवारीमा नबस्ने बताउने गरेको उनी निकट नेताहरु बताउँछन्।

एकता प्रक्रियामा नेताहरुको व्यवस्थापन गर्न नसक्दा तत्कालीन माओवादीमा धेरै नेताहरु असन्तुष्ट छन् । प्रदेश र तल्ला कमिटीहरुमा एकता टुंगो लाग्दासम्म असन्तुष्टहरुको संख्या झन् बढ्ने अनुमान गरिएको छ ।

को हुन् हितमान ?

बाग्लुङ पुर्ख्यौली घर भएका हितमान अखिल क्रान्तिकारीको पूर्वअध्यक्ष हुन् । शान्ति प्रक्रियापछि नेवाः राज्य (काठमाडौं उपत्यका)को जिम्मेवारी सम्हालेका शाक्य पहिलो संविधानसभा निर्वाचनबाट सभासदसमेत बनेका थिए ।

पार्टी बिभाजनपछि उनी मोहन वैद्य नेतृत्वको माओवादीमा गएका थिए । तर, पछि रामबहादुर थापा ‘बादल’ नेतृत्वको समूहसँगै पुनः प्रचण्ड नेतृत्वको माओवादीमा फर्किएका थिए ।

प्रतिनिधिसभा निर्वाचनमा एमाले र माओवादी मिलेर चुनाव लड्दा पनि काठमाडौं क्षेत्रनम्बर १० बाट उनी पराजित भएका थिए ।