बैतडीमा वर्तमान र पूर्वराज्यमन्त्री चुनावी मैदानमा
सारांश
- बैतडी ।
- पहिलो चरणअन्तर्गत आगामी मंसिर १० गते हुने प्रदेशसभा र प्रतिनिधिसभा निर्वाचनका लागि बैतडीमा वर्तमान र पूर्व राज्यमन्त्री चुनावी मैदानमा उत्रिएका छन् ।
- अहिले शेरबहादुर देउवा सरकारमा वाणिज्य राज्यमन्त्री रहेका लोकतान्त्रिक गठबन्धनका तर्फबाट साझा उम्मेदवार बनेका नेपाली काँग्रेसका नेता नरबहादुर चन्द प्रतिनिधिसभा सदस्य निर्वाचनको लागि चुनावी मैदानमा उत्रिनु भएको छ ।
बैतडी । पहिलो चरणअन्तर्गत आगामी मंसिर १० गते हुने प्रदेशसभा र प्रतिनिधिसभा निर्वाचनका लागि बैतडीमा वर्तमान र पूर्व राज्यमन्त्री चुनावी मैदानमा उत्रिएका छन् ।
अहिले शेरबहादुर देउवा सरकारमा वाणिज्य राज्यमन्त्री रहेका लोकतान्त्रिक गठबन्धनका तर्फबाट साझा उम्मेदवार बनेका नेपाली काँग्रेसका नेता नरबहादुर चन्द प्रतिनिधिसभा सदस्य निर्वाचनको लागि चुनावी मैदानमा उत्रिनु भएको छ ।
यस्तै, बाम गठबन्धनबाट साझा उम्मेदवार रहेको नेकपा (एमाले)का नेता पूर्व अर्थराज्यमन्त्री दामोदर भण्डारी पनि प्रतिनिधिसभाको लागि बैतडीमा चुनावी मैदानमा उत्रिनु भएको छ । पूर्व अर्थराज्यमन्त्री भण्डारी केपी ओली प्रधानमन्त्री रहँदा अर्थ राज्यमन्त्री थिए ।
यसअघि विसं २०७० मा सम्पन्न भएको संविधानसभा निर्वाचनमा दुवैजना बैतडीबाट निर्वाचित भएका थिए । बैतडीमा २०७० सालको संविधानसभा निर्वाचनको बेला २ निर्वाचन क्षेत्र रहेका थिए ।
भण्डारी क्षेत्र नं १ बाट विजयी भएका हुन् भने चन्द क्षेत्र नं २ बाट विजयी भएका हुन् । दुवै गठबन्धनका उम्मेदवार भएकाले कडा प्रतिस्पर्धा हुने अनुमान गरिएको छ । दुवै उम्मेदवारले मनोनयन दर्ता गर्ने क्रममा आफ्नो जित सुनिश्चित भएको दाबी गरेका छन् ।
सारा कम्युनिष्ट एक भएर आएकाले सारा लोकतान्त्रिक शक्ति एक भएर प्रतिनिधि र प्रदेशसभामा लड्नुपरेको वाणिज्य राज्यमन्त्री एवं लोकतान्त्रिक गठबन्धनका तर्फबाट काँग्रेसका प्रतिनिधिसभा उम्मेदवार नरबहादुर चन्दको भनाइ छ ।
देशमा जारी गरिएको संविधानलाई कार्यान्वयन गर्दै आत्मनिर्भर अर्थतन्त्रको बाटोबाट मुलुकको विकास गरी समाजवादको दिशातर्फ अघि बढ्न आफूहरुको उम्मेदवारी भएको बाम गठबन्धनबाट एमालेका प्रतिनिधिसभा उम्मेदवार दामोदर भण्डारीको भनाइ छ ।
बैतडीमा नेपाली काँग्रेस र राप्रपाले लोकतान्त्रिक गठबन्धन तथा एमाले र माओवादी केन्द्रले बाम गठबन्धनसहित उम्मेदवारी दर्ता गरेका छन् ।
यसैगरी, प्रतिनिधिसभाका लागि एक क्षेत्र रहेको बैतडीमा विवेकशील साझा पार्टीका तर्फबाट नारायणदत्त अवस्थी, राष्ट्रिय जनमोर्चाबाट वीरेन्द्रसिंह भण्डारी, जनसमाजवादी पार्टी नेपालबाट धनबहादुर बोहरा र एकीकृत राप्रपा (राष्ट्रवादी) बाट त्रिलोकबहादुर चन्दले उम्मेदवारी दर्ता गराएको मुख्य निर्वाचन अधिकृतको कार्यालयले जनाएको छ ।
यसैगरी, प्रदेशसभाका लागि दुई निर्वाचन क्षेत्र रहेको बैतडीमा लोकतान्त्रिक गठबन्धन र बाम गठबन्धनका साथै अन्य दलले पनि उम्मेदवारी दर्ता गराएका छन् ।
बैतडी क्षेत्र नं १ मा लोकतान्त्रिक गठबन्धनका तर्फबाट नेपाली काँग्रेसका हरिमोहन भण्डारी, बाम गठबन्धनका तर्फबाट नेकपा (माओवादी केन्द्र)का प्रेमप्रकाश भट्ट, जनसमाजवादी पार्टी नेपालका तर्फबाट भगीरथसिंह कुँवर र राष्ट्रिय जनमोर्चाका तर्फबाट अर्जुनसिंह मडैले उम्मेदवारी दर्ता गराएको छ ।
यसैगरी, बैतडी क्षेत्र नं २ मा लोकतान्त्रिक गठबन्धनका तर्फबाट राप्रपाका गणेश चन्द, बाम गठबन्धनका तर्फबाट नेकपा (एमाले)का लीलाधर भट्टले उम्मेदवारी दर्ता गर्नुभएको मुख्य निर्वाचन अधिकृत विष्णुप्रसाद गौतमले जानकारी दिए । क्षेत्र नम्बर २ मा भने बाम र लोकतान्त्रिक गठबन्धनबाहेक अरुले मनोनयन दर्ता गराएका छैनन् ।
बैतडीमा अरु पार्टीले पनि प्रतिनिधिसभाको लागि उम्मेदवारी दर्ता गराएको भए पनि बाम गठबन्धन र लोकतान्त्रिक गठबन्धनबीच मुख्य प्रतिस्पर्धा हुने देखिएको छ । नेपाली काँग्रेसले प्रदेश नं ७ मा पहिलो चरणअन्तर्गत निर्वाचन हुने जिल्लामध्ये बैतडीमा मात्रै राप्रपासँग तालमेल गरेको हो ।
एमालेले भने पहिलो चरणमा निर्वाचन हुने प्रदेश नं ७ का चार जिल्लामध्ये बैतडी, दार्चुला, बझाङमा तालमेल गरेको छ भने बाजुरामा एमालेले सबै आफ्ना उम्मेदवार उठाएको छ ।
बैतडीमा छ दलले प्रतिनिधिसभाका लागि उम्मेदवारी दर्ता गराएको मुख्य निर्वाचन अधिकृतको कार्यालयले जनाएको छ । एकलाख ३२ हजार ३१७ मतदाता रहेको बैतडीमा प्रतिनिधिसभाका लागि १ र प्रदेशसभा निर्वाचनका लागि २ क्षेत्र निर्धारण गरिएको छ ।
प्रतिक्रिया