यस्तो छ नयाँ मर्यादाक्रम, प्रदेशप्रमुख साताैंमा, मुख्यमन्त्री नवौं स्थानमा

काठमाडौं, माघ १७ । सरकारले संघीय शासन लागू भएपछि स्थापित संघ, प्रदेश र स्थानीय तहका पदाधिकारी तथा कर्मचारीलाई समेटेर नयाँ मर्यादाक्रम तोकेको छ। पुरानो मर्यादाक्रम खारेज गर्दै सोमबारको मन्त्रिपरिषद् बैठकले संघीय शासनअनुरूप नयाँ मर्यादाक्रम निर्धारण गरेको हो।

मर्यादाक्रमममा राष्ष्ट्रपतिदेखि गाउँपालिका उपाध्यक्षसम्म समेटिएको छ । नयाँ शासकीय स्वरूपमा आएका प्रदेश प्रमुख, मुख्यमन्त्री, प्रदेशमन्त्री, महानगरपालिकाका प्रमुख–उप्रमुख तथा गाउँपालिकाका अध्यक्ष–उपाध्यक्षसहितको मर्यादाक्रम निर्धारण गरिएको हो । आजको अन्नपूर्ण पोष्ट दैनिकमा खबर छ ।

मर्यादाक्रममा ३४ नम्बरसम्म छ। सरकारले लागू गरेको नयाँ मर्यादाक्रमको पहिलो नम्बरमा राष्ट्रपति छन् भने सबैभन्दा तल ३४ नम्बरमा नेपाली सेनाका सहायक सेनानी छन्। दोस्रो नम्बरमा उपराष्ट्रपति र तेस्रोमा प्रधानमन्त्री, चौथोमा प्रधानन्यायधीश, पाँचौंमा प्रतिनिधिसभाका सभामुख र राष्ट्रियसभाका अध्यक्षलाई राखिएको छ। यस्तै छैटौं नम्बरमा पूर्वराष्ट्रपति र उपप्रधानमन्त्रीलाई राखिएको छ।

प्रदेशमा राष्ट्रपति सरहको भूमिकामा रहने प्रदेश प्रमुखलाई मर्यादाक्रमको सातौं स्थानमा राखिएको छ। आठौं स्थानमा पूर्वउपराष्ट्रपति र पूर्वप्रधानमन्त्रीलाई राखिएको छ। प्रदेशको मुख्यमन्त्री र पूर्वप्रधानन्यायाधीश, संसद्का पूर्वसभामुख पूर्वअध्यक्ष मर्यादाक्रमको नवौं स्थानमा परेका छन्।