५० वटा अण्डा खाने बाजी राखदा गयो ज्यान

काठमाडौं। घाँटी हेरी हाड निल्नु भन्ने उखान हाम्रो समाजमा प्रचलित छ । यो उखान त्यसै प्रचलनमा आएको होइन यसले दिने सन्देश पनि सही छ । यतै आफ्नो क्षमता नहेरी बाजी थाप्दा एक व्यक्तिले ज्यानै गुमाउनुपरेको छ । ती व्यक्तिले ५० वटा अण्डा खाने बाजी थापेका थिए । तर, सबै अण्डा खाएर नसक्दै उनले ज्यानै गुमाउनु परेको छ ।

खलीज टाइम्सको समाचार अनुसार घटना भारतको उत्तर प्रदेशको जौनपुर जिल्लाको हो । मृतक ४२ वर्षका सुवास यादव भएको बताइएको छ । पुलिसका अनुसार यादव एक साथीसँग अण्डा खानको लागि बीबीगंज बजारमा गएका थिए । कुरै कुरामा उनीहरुबीच बहस भयो र उनीहरुले ५० अण्डा खाने शर्तमा २ हजार रुपैयाँको बाजी राखे ।

सुवासले च्यालेन्ज स्वीकार गरे र अण्डा खान सुरु गरे । उनले ४१ वटा अण्डा खाए । जब उनले ४२ औं अण्डा खान थाले उनी बेहोस भएर ढले । स्थानीयले उनलाई तत्कालै जिल्ला अस्पताल लिएर गए । अस्पतालले उनलाई संजय गान्धी पोस्ट ग्रयाजुएट इन्स्टिच्युट अफ मेडिकल साइन्समा रिफर गर्यो । जहाँ उनको केही घण्टापछि मृत्यु भयो । डाक्टरले उनले धेरै खाएर उनको मृत्यु भएको बताएका छन् ।