यातायात क्षेत्रमा बागमती प्रदेशको छलाङ: अब प्रदेशबाटै अनुमतिपत्र छपाइ र डिजिटल सेवाको तयारी

बागमती प्रदेश सरकारले सरकारी सेवामा प्रविधि र पारदर्शिता भित्र्याउँदै सेवाग्राहीको ढोकामै यातायात सेवा पुर्‍याउने रणनीतिक योजना सार्वजनिक गरेको छ । नागरिकलाई सरकारी कार्यालयमा धाउनुपर्ने झन्झटबाट मुक्ति दिन र सुशासन कायम गर्न सरकारले आर्थिक वर्ष २०८३/८४ को बजेटमार्फत सवारी चालक अनुमतिपत्रको छपाइ तथा वितरण प्रदेशबाटै गर्ने गरी नयाँ नीति ल्याएको हो ।

 प्रदेशका आर्थिक मामिला तथा योजनामन्त्री प्रभात तामाङका अनुसार संघीय सरकारसँगको समन्वयमा पुराना कागजी फाइल र ढड्डाहरूलाई विद्युतीय अभिलेखमा रूपान्तरण गरी राष्ट्रिय परिचयपत्र र नागरिक एपसँग अन्तरआबद्धता कायम गर्ने तयारी थालिएको छ ।

यातायात कार्यालयहरूमा हुने सम्भावित बिचौलियाको चलखेल र मिलोमतो अन्त्य गर्नका लागि सरकारले प्रयोगात्मक परीक्षालाई स्वचालित बनाउने र लिखित परीक्षा अनलाइनमार्फत सञ्चालन गर्ने प्रारुप तयार पारेको छ । यसका साथै ब्लुबुक नवीकरण र सवारी कर भुक्तानीसमेत विद्युतीय माध्यमबाटै गर्न सकिने गरी प्रणालीको स्तरोन्नति गर्न आवश्यक बजेट विनियोजन गरिएको छ ।

यो नयाँ व्यवस्था लागू भएपछि सेवाग्राहीले मोबाइल एपकै माध्यमबाट आफ्नो सवारी चालक अनुमतिपत्र, ब्लुबुक र यान्त्रिक परीक्षणसम्बन्धी सम्पूर्ण जानकारी घरमै बसेर सहजै हेर्न सक्नेछन् । कार्यस्थललाई सेवाग्राहीमैत्री बनाउन डिजिटल डिस्प्ले, टोकन प्रणाली, व्यवस्थित प्रतीक्षालय र सफा शौचालय जस्ता न्यूनतम भौतिक पूर्वाधार सुधारका लागि समेत विशेष प्राथमिकता दिइएको छ ।

अन्ततः सार्वजनिक यातायातको नियमित यान्त्रिक परीक्षणलाई आधुनिक र वैज्ञानिक बनाउन निजी क्षेत्रको सहकार्यमा स्वचालित प्रविधियुक्त सवारी परीक्षण केन्द्र स्थापना गरिनेछ । यस रूपान्तरणले यातायात क्षेत्रको सेवा प्रवाहलाई कागजरहित, पारदर्शी र पूर्ण रूपमा प्रविधिमैत्री बनाउने विश्वास प्रदेश सरकारले लिएको छ ।