थिमीबाट नागरिकता देखाएर ग्यास वितरण: बिहानैदेखि लाइनमा बसेका उपभोक्ताद्वारा व्यवस्थापनप्रति गुनासो

भक्तपुरको मध्यपुर थिमीस्थित राष्ट्रिय क्षयरोग केन्द्रको प्राङ्गणमा आइतबार बिहानैदेखि ग्यास लिने सर्वसाधारणको उल्लेख्य भीड लागेको छ। नेपाल आयल निगमको विशेष समन्वयमा अत्यावश्यक अवस्थामा रहेका उपभोक्तालाई लक्षित गरी करिब तीन हजार सिलिन्डर ग्यास वितरण गर्ने व्यवस्था मिलाइएको हो।

निगमका सहजकर्ता रामचन्द्र पाण्डेका अनुसार उपभोक्ताले ग्यास प्राप्त गर्नका लागि नागरिकता वा राष्ट्रिय परिचयपत्र देखाएर मात्र ग्यास लिन पाउने व्यवस्था गरिएको छ। यस केन्द्रबाट नेपाल, एचपि, सूर्य, सगर, एभरेस्ट, सुगम, एचटिसि, त्रिवेणी, राजधानी र गीता कम्पनीका ग्यास सिलिन्डरहरू वितरण भइरहेका छन्।

ग्यासको सहज आपूर्ति नहुँदा सर्वसाधारण बिहान ४ बजेदेखि नै घण्टौँसम्म लाइनमा बस्न बाध्य भएका हुन्। ग्यासको अभाव चुलिँदै जाँदा नागरिकले सास्ती भोग्नुपरेको र राज्यको व्यवस्थापन पक्ष फितलो भएको भन्दै कतिपय उपभोक्ताले आक्रोश तथा गुनासो व्यक्त गरेका छन्।

काठमाडौँ उपत्यकामा देखिएको इन्धन समस्यालाई सम्बोधन गर्न निगमले ठिमीका अतिरिक्त टेकु, चपली, कीर्तिपुर, तारकेश्वर, नयाँबजार र चन्द्रागिरीका तोकिएका स्थानहरूबाट पनि एकैसाथ ग्यास बिक्रीको व्यवस्था मिलाएको हो। प्राविधिक सहजता र न्यायोचित वितरण सुनिश्चित गर्न फरक-फरक स्थान चयन गरिएको छ।

आवश्यकताभन्दा बढी ग्यास सञ्चित गर्ने प्रवृत्ति रोक्न निगमले सर्वसाधारणलाई अपिल गरेको छ। वास्तवमै ग्यासको अभाव भएका उपभोक्तालाई मात्र खरिद गर्न र अनावश्यक स्टक नराख्न आग्रह गर्दै आयल निगमले आपूर्ति व्यवस्था चाँडै सहज हुने विश्वास दिलाएको छ।