उम्मेदवारी फिर्ता लिदै निरज आचार्यले भने– केपी ओलीले दिएको टिकट उनैलाई फिर्ता

८ कात्तिक, जाजरकोट । जाजरकोटको प्रदेश सभा ‘क’ बाट नेकपा एमालेका उम्मेदवार बनेका निरज आचार्यले पार्टीको निर्देशनपछि उम्मेदवारी फिर्ता लिएका छन्। बुधवार विहान सदरमुकाम खलंगामा पत्रकार सम्मेलन गरी आचार्यले अध्यक्ष केपी शर्मा ओलीप्रति आक्रोश व्यक्त गर्दै उम्मेदवारी फिर्ता लिएको घोषणा गरे। पत्रकार सम्मेलनमा आचार्यले भने– मैले पार्टी स्थायी कमिटी बैठकबाट टिकट पाएर उम्मेदवारी दिएँ । तर, मेरै कारण वामपन्थी गठबन्धन भत्किन नदिन पार्टीको निर्देशन शिरोपर गर्नुपर्या । अध्यक्षले निरंकुश शैलीमा मेरै टिकट खोस्नुभयो, त्यसैले ओलीको टिकट ओलीलाई नै फिर्ता भयो।’

एमाले माओवादी सिट बाँडफाँटका क्रममा जाजरकोटको प्रतिनिधिसभा माओवादीलाई र प्रदेशसभा दुवै एमालेको भागमा परेको थियो।  तर, उम्मेदवारी मनोयनका दिन हुम्लामा एक सिट माओवादीले पाउने भएपछि जाजरकोट एमालेले एउटा छाड्ने सहमति केन्द्रमा भयो । तर त्यतिबेलासम्म जाजरकोट क मा आचार्य र ख मा एमालेकै करवीर शाहीले मनोनयन दर्ता गरिसकेका थिए । माओवादीका गणेशप्रसाद सिंहले पनि आचार्यकै क्षेत्रमा उम्मेदवारी दर्ता गराएपछि विवाद भएको थियो ।

प्रदेश ‘ख’ मा पनि माओवादीका नरबहादुर कार्कीले उम्मेदवारी दिएका छन् ।

आचार्यको उम्मेदवारी फिर्तासँगै माओवादीका सिंह प्रदेश ‘क’ मा वाम गठबन्धनको आधिकारिक उम्मेदवार बनेका छन् ।

प्रतिनिधिसभामा स्वतन्त्र उम्मेदवारी दिएका एमालेका गोविन्दविक्रम शाहले पनि उम्मेदवारी फिर्ता लिने तयारी गरेका छन् ।

उम्मेदवारी फिर्ता लिन शाहले राष्ट्रियसभा सदस्य वा प्रदेश तथा प्रतिनिधिसभाको समानुपातिकतर्फ आफ्नो स्थान सुरक्षित गर्नुपर्ने माग गर्दै आएका छन्। उनले पार्टीले आफूलाई अन्याय गरेको भन्दै सम्मानजनक स्थानको माग गरेका छन् ।

एमाले नेताहरुले जाजरकोटमा स्थानीय चुनाव परिणामले एमाले पहिलो पार्टी भए पनि सिट बाँडफाँटमा माओवादीलाई बढी दिइएकोमा केन्द्रीय नेतृत्वप्रति आक्रोश पोखेका छन् ।