एक युवतीको बयान : ६ महिनासम्म हरेक दिन बलात्कृत भएँ

‘६ महिनासम्म हरेक दिन उसले मलाई बलात्कार गरिरह्यो । मैले मर्न प्रयास गरेँ’ यो भनाइ हो एक यजिदी (इराकी) युवती इखलासको ।

इखलास त्यतिबेला १४ वर्ष जतिकी थिइन्, जब इस्लामिक स्टेटको कथित लडाकूले उनलाई अपहरण ग¥यो र यौनदासीको रुपमा बन्धक बनायो ।

सन् २०१४ मा इस्लामिक स्टेटको निशानामा विशेषगरी यजिदी मानिसहरु थिए । यजिदी एउटा धार्मिक समुदाय हो, जो उत्तरी इराकको क्षेत्रमा सदियौंदेखि बस्दै आएका छन् ।

इस्लामिक स्टेटका चरमपन्थी लडाकूहरुले सो समुदायका पुरुषहरुको हत्या गरे भने महिलालाई आफ्नो नियन्त्रणमा लिए । इखलास पनि तिनै महिलामध्ये एक हुन् ।

यद्यपि, इखलासले इस्लामिक स्टेटको नियन्त्रणबाट भाग्ने ठूलो प्रयास गरिन्, तर उनी असफल भइन् । आईएसको लडाकूले उनलाई बन्धक बनायो र यौनदासीको रुपमा ६ महिनासम्म राख्यो ।

आईएसका एक लडाकूले १ सय ५० युवतीमध्ये चिठ्ठाद्वारा उनलाई चुनेको इखलासले बताइन् । उनी भन्छिन्, ‘त्यो व्यक्ति अत्यन्त कुरुप थियो । म यति डराएँ कि उसको तर्फ हेर्न पनि मुस्किल थियो ।’

एक दिन त्यो लडाकू लडाइँमा कतै गएको थियो, त्यही बेला इखलासलाई भाग्ने मौका मिल्यो र उनी भाग्न सफल भइन् पनि । त्यसपछि उनलाई एउटा शरणार्थी शिविरमा लगियो ।

दुःख र त्रासले भरिएका ती दिन याद गर्दै इखलास भन्छिन्, ‘म नरोईकन पनि तपाईंलाई ती घटना कसरी भन्न सकिरहेको छु ? मलाई लाग्छ मेरो आँशु सुकिसकेको छ ।’

इखलास अहिले जर्मनीको एक मानसिक अस्पतालमा छिन् । त्यहाँ उनलाई उपचारको साथसाथै शिक्षा पनि दिँदै आएको छ । इखलास वकिल बन्न चाहन्छिन् । (बीबीसीबाट)