कुवेतले नेपाललाई दियो १४२ रनको टारगेट
सारांश
- आईसीसी टी-२० विश्वकप एसिया छनोट अन्तर्गतको आजको खेलमा नेपाललाई कुवेतले १४२ रनको लक्ष्य दिएको छ ।
- सिंगापुरको इन्डियन एसोसियशन क्रिकेट मैदानमा टस जितेर नेपालले फिल्डिङ रोजेको थियो ।
- निर्धारित ओभरमा कुवेतले ९ विकेट गुमाउँदै १४१ रन जोडेको थियो ।
आईसीसी टी-२० विश्वकप एसिया छनोट अन्तर्गतको आजको खेलमा नेपाललाई कुवेतले १४२ रनको लक्ष्य दिएको छ । सिंगापुरको इन्डियन एसोसियशन क्रिकेट मैदानमा टस जितेर नेपालले फिल्डिङ रोजेको थियो । निर्धारित ओभरमा कुवेतले ९ विकेट गुमाउँदै १४१ रन जोडेको थियो ।
करण केसीले आफ्नो स्पेलको पहिलो बलमै ओपनर मीट भाब्सरलाई आउट गरेका थिए । केसीले ओपनर भाब्सरलाई आउट गरेपछि कुवेतको विकेट झर्न सुरु भएको थियो । छैटौं ओभरको पहिलो र अन्तिम बलमा बसन्त रेग्मीले क्रशसः रभिजा सान्दरुवान र अदनान इद्रीसलाई आउट गरेपछि पावर प्लेको समाप्तिमा कुवेतको स्कोर ४६–३ थियो । रभिजाले १५ र अदनानले १४ बलमा २५ रनको पारी खेले ।
नवौं ओभरमा सन्दीप लामिछानेले २ विकेट लिए । उनले ८.३ ओभरमा बिलाल ताहिरलाई १३ रनको स्कोरमा कप्तान पारस खड्काको हातबाट क्याच आउट गराए । ८.६ ओभरमा उस्मान वाहीदलाई एलबीडब्ल्यूको धरापमा पारे । उनले खाता खोल्न सकेनन् ।
१३.५ ओभरमा अविनाश बोहोराले मोहम्मद अस्लामलाई २३ रनको स्कोरमा आउट गर्दा कुवेत ९४–६ को अवस्थामा पुग्यो । त्यसको अर्को ओभरमा सन्दीपले शिराज खानलाई बोल्ट आउट गरे । अन्तिमक्रमका ब्याट्सम्यानहरु मोहम्म असनलाई बसन्तले आउट गरे । जन्दु अहमदलाई करणले सोमपाल कामीको हातबाट क्याच आउट गराए ।
कुवेतका कप्तान मोहम्मद कासिफले सातौं नम्बरमा ब्याटिङमा आएर ३६ बलमा ४९ रनको विस्फोटक अविजित पारी खेले । उनले १९ औं ओभरमा करण केसीलाई २ छक्का प्रहार गरे भने अविनाश बोहोराको अन्तिम ओभरमा १ चौका र २ छक्का प्रहार गरे । अन्तिम २ ओभरमा कुवेतले ३० रन जोडेको थियो ।
नेपालका लागि बसन्त रेग्मी र सन्दीप लामिछानेले ३(३ विकेट लिए । त्यस्तै करण केसीले २ विकेट लिँदा अविनाश बोहोराले १ विकेट लिए ।
प्रतिक्रिया