जनयुद्ध, चुनाव चिन्ह र संगठनबारे सहमतिपछि एकता हुन्छ : भुसाल

वैशाख १०, काठमाण्डौ । नेकपा माओवादी केन्द्रकी प्रवक्ता पम्फा भुसालले केही विषयहरु टुङ्गिनासाथ एमालेसँग पार्टी एकता हुने दाबी गरेकी छिन् ।

नेपाली रेडियो नेटवर्कको कार्यक्रम नेपाली बहसमा  कुरा गर्दै प्रवक्ता भुसालले जनयुद्ध, चुनाव चिन्ह र संगठनबारे विवाद नमिलेको बताइन् ।

राजनीतिक प्रतिवेदनमा जनयुद्धको भूमिका उल्लेख भइसकेको भन्दै उनले भनिन्, “जनयुद्धले नेपालको परिवर्तनमा खेलेको भूमिकाबारे प्रतिवेदनमा स्पष्ट छ ।” तर विधानमा जनयुद्धको विषयलाई कसरी समेट्ने भन्ने कुरामा विवाद रहेको उनको भनाई छ ।

“जनयुद्ध भनेको यो धर्तीमा भएको कुरा हो । १० वर्षमा दशौँ हजारको बलिदान भएको आन्दोलन हो । यस विषयमा राजनीतिक प्रतिवेदनमा राम्रोसँग समिक्षा भएको छ । विधानमा राख्ने कुरामा सबैको एकमत नभएको हो ।” भुसालले भनिन् ।

कुरा मिल्न नसकेका विषयलाई दुवै दलका अध्यक्षहरुले समाधान गर्ने र पार्टी एकता गरिने उनले बताईन ।

एकता प्रक्रिया अन्यौलमा परेको नभै गृहकार्य लम्बिएको उनको दाबी छ ।

आइतबारको कार्यक्रममा भएको विवादबारे भुसालले दुईवटा पार्टी भइन्जेल यस्ता समस्या आउन सक्ने तर पार्टी एकता भएपछि सबै समस्या समाधान हुने दाबी गरिन् ।
नेतृत्वको विषयमा पनि कुनै विवाद नभएको उनको जिकिर छ । महाधिवेशनपछि आफै अध्यक्ष बन्नुपर्छ भनेर प्रचण्डले कहिल्यै पनि नभनेको भुसालको भनाई छ ।