सामाजिक कार्यमा गैरे सेवा समाज, पैसा नभएर घर फर्किएका बालकलाई ६१ हजार

दाङ, १५ जेठ । गैरे सेवा समाज जापान समाज सेवामा सक्रिय भएको छ । समाजले त्रिवेणी गाउँपालिका– ३ की ३ वर्षीय बालक सुशील बोहराको उपचारार्थ ६१ हजार ५ रुपैयाँ आर्थिक सहयोग उपलव्ध गराएको छ ।

गैरे सेवा समाज दाङ शाखाका सचिव ईश्वरीप्रसाद गैरेको सक्रियतामा तुलसीपुरस्थित तुलसी हस्पिटलमा एक कार्यक्रमको आयोजना गरी सहयोग रकम हस्तान्तरण गरिएको छ । सुशीलकी आमा मुना बोहरालाई सहयोग रकम हस्तान्तरण गरिएको सो कार्यक्रममा केशवराज गैरे, यमकान्त गैरे, बालकृष्ण गैरे र तुलसी हस्पिटलका डा. किशोर खत्रीले मन्तव्य व्यक्त गरेका थिए । तुलसीराम गैरेको अध्यक्षतामा भएको सो कार्यक्रमको सञ्चालन ईश्वरीप्रसाद गैरेले गरेका थिए ।

त्रिवेणी गाउँपालिका ३ की मुना बोहराको ३ बर्षीय बालक सुशीलको आर्थिक अभावमा उपचार गर्न नसकी घरमा फिर्ता भएको खबर गोरक्ष दैनिकमा प्रकाशित भएको थियो । गैरे सेवा समाज दाङ शाखाका सचिव ईश्वरीप्रसाद गैरेको पहलमा गैरे सेवा समाज जापानले उक्त सहयोग रकम पठाएको थियो ।