अविरल वर्षापछि ७ राजमार्ग पूर्ण अवरुद्ध, ५१ सडकखण्ड पुनः सञ्चालन

लगातारको अविरल वर्षाका कारण देशभरका सडक सञ्जालमा ठूलो क्षति पुगेपछि सडक विभाग र सुरक्षा निकायले अवरुद्ध राजमार्गहरू खुलाउन एकीकृत प्रयास तीव्र पारेका छन् । प्राकृतिक विपद्का कारण नागरिकको आवागमन प्रभावित भइरहेका बेला सडक खुलाउने यो राज्यको सक्रियताले यात्रुहरूमा केही राहत र सुरक्षाको भरोसा जगाएको छ ।

सडक विभागका अनुसार हालसम्म देशभरका सात प्रमुख राजमार्ग पूर्ण रूपमा र १२ वटा आंशिक रूपमा प्रभावित भएका छन् । प्रतिकूल मौसमका बाबजुद विभागले उच्च प्राथमिकताका साथ डोजर, एक्साभेटर र लोडर जस्ता भारी उपकरण परिचालन गरी ५१ वटा अवरुद्ध सडकखण्ड मर्मत सम्भार गरेर पुनः सञ्चालनमा ल्याइसकेको छ ।

नेपाल प्रहरीका अनुसार ललितपुरको कान्तिलोकपथ, इलामको मेची राजमार्ग, खोटाङको दिक्तेल–भोजपुर खण्ड तथा सिन्धुपाल्चोकको अरनिको राजमार्गका विभिन्न क्षेत्र पहिरोका कारण ठप्प छन् । विभागका प्रवक्ता श्यामबहादुर खड्काले जोखिम न्यूनीकरणका लागि यात्रुहरूलाई यात्रामा निस्कनुअघि अनिवार्य रूपमा सडकको पछिल्लो अवस्था बुझ्न अपिल गर्नुभएको छ ।

 बाढीको उच्च जोखिमका कारण बिपी राजमार्ग र कान्तिलोकपथमा रात्रिकालीन सवारी आवागमन पूर्ण रूपमा रोकिएको छ भने मध्यपहाडी लोकमार्ग र पासाङल्हामु सडकखण्ड एकतर्फी खुलाइएको छ ।

मनसुन अवधिभर जोखिमयुक्त सडकखण्डहरूमा निरन्तर निगरानी राख्न प्राविधिक टोली चौबीसै घण्टा तयारी अवस्थामा राखिएको सडक विभागले जनाएको छ । नागरिकको सुरक्षित यात्राको अधिकार सुनिश्चित गर्न राज्यका संयन्त्रहरू परिचालित भइरहेकाले प्राकृतिक विपद्को यो समयमा सवारी चालक र यात्रुहरूले समेत आवश्यक सतर्कता अपनाउनु जरुरी देखिन्छ ।