संरक्षण नहुँदा अलपत्र बन्यो ‘लक्ष्मीनारायण गुठी’

रामपुर (पाल्पा), १७ साउन । गण्डकीबेँसीकै महत्वका रुपमा रहेको ऐतिहासिक ‘लक्ष्मीनारायण गुठी’ अलपत्र अवस्थामा रहेको छ ।

पौराणिक समयमा धार्मिक तीर्थस्थलका रुपमा परिचित रामपुरको लक्ष्मीनारायण गुठी संरक्षण नहुँदा अहिले अलपत्र बनेको हो ।

रामपुर नगरपालिका–४ स्थित खोप्टारमा रहेको यस गुठीको भौतिक संरचना मर्मत तथा सम्भारमा सरोकारवाला निकाय, स्थानीयवासीले चासो नदिँदा ऐतिहासिक महत्व नै हराउँदै गएको छ । विसं १८७९ मा साबिक रामपुर गाविस वडा नं ८ बस्ने समाजसेवी तुल्सीराम रेग्मीले गुठी निर्माण गर्नुभएको हो ।

यहाँ तत्कालीन समयमा यस क्षेत्रमा भित्रिने विशिष्ट व्यक्तिको स्वागत, बसोबास र धर्मशालाका रुपमा गुठी निर्माण गरिएको हो । तत्कालीन समयमा निकै महत्वका साथ हेरिएको यस ऐतिहासिक गुठी अहिले बेवारिसे अवस्थामा रहँदा स्थानीय सरोकारवाला व्यक्तिले चिन्ता व्यक्त गर्न थालेका छन् ।

तीनतले आठ कोठा रहेको सो गुठी झण्डै १० रोपनी क्षेत्रफलमा फैलिएको छ । केही समय त रेग्मी परिवारले संरक्षण गरेपनि विगत २० वर्षयता यो संरक्षणविहीन हुँदा जीर्ण अवस्थामा छ ।