रसुवामा २५ प्रतिशत मत बदर

रसुवा, मंसिर २५–मंसिर १० गते रसुवामा भएको प्रतिनिधिसभा तथा प्रदेशसभा चुनावमा साढे ६ हजार मत पूर्ण बदर भएको छ ।

निर्वाचन शिक्षा कार्यक्रम प्रभावकारी रुपमा सञ्चालन हुन नसक्दा बदर मत बढेको हो । जिल्ला निर्वाचन कार्यालय रसुवाका अनुसार ६ हजार पाँच सय ९१ मत पूर्ण बदर भएको छ ।

प्रत्यक्षतर्फ दुई हजार मत बदर भएकोमा समानुपातिकतर्फ चार हजार पाँच सय ९१ मत बदर भएको जिल्ला निर्वाचन अधिकारी नविन खालिङले बताउनुभयो ।

समानुपातिकतर्फ तीन हजार चार सय ३७ मत आशिंक रुपमा बदर भएको पाइएको छ । ३२ हजार तीन सय २२ मतदाता रहेको जिल्लामा प्रत्यक्ष तथा समानुपातिकतर्फ २६ हजार एक सय मत खसेको थियो ।

प्रत्यक्षतर्फ प्रतिनिधिसभामा २६ हजार ८७ मत खसेको एक हजार एक सय ४५, प्रदेशसभा क मा १३ हजार दुई सय ५३ मत खसेको ४ सय ५० र प्रदेशसभा ख मा १३ हजार तीन सय ५३ मत खसेकोमा ४ सय ५ मत पूर्ण बदर भएको छ ।

त्यसैगरी समानुपातिकतर्फ प्रतिनिधिसभामा खसेको २६ हजार ९८ मतमध्ये २२ सय ९४ पूर्ण र नौ सय ८ आंशिक रुपमा बदर भएको छ । प्रदेशसभामा खसेको २६ हजार ९८ मतमध्ये २२ सय ९७ पूर्ण र २५ सय २९ आंशिक रुपमा बदर भएको छ ।

मत माग्नका लागि घरदैलो अभियानमा लागेका राजनीतिक दलले गठबन्धनका कारण समानुपातिकतर्फ मत नमागेपछि बढी मात्रामा मत बदर भएको पार्टीका नेताहरुले बताएका छन् ।
मतदानको क्रममा एउटै मत्रपत्रमा दुई वटा छाप लगाएको र ल्याप्चे लगाएको मत बदर भएको सहायक मतदान अधिकृत ढाकाराम पौडेलले बताउनुभयो ।

उहाँले भन्नुभयो, ‘जिल्लामा यसभन्दा अघि भएका निर्वाचनमा भन्दा यो पटक अत्याधिक मत बदर भएको छ, आशिंक रुपमा बदर भएको मतलाई मान्यता नदिने निर्वाचन आयोगको निर्णय भएको भएपनि यहाँ पूर्ण बदर मत नै धेरै भएको देखिन्छ ।’