सुरु भयो डीआइजीहरुको सरुवा चलखेल : दुई भाइको भिडन्त !!

नेपाल प्रहरीको केन्द्रीय अनुसन्धान ब्यूरो(सीआइबी)को कार्यशैलीबाट आइजीपी सर्वेन्द्र खनाल सन्तुष्ट हुन नसकेको स्रोत बताउछ । जटिल प्रकृतिका र संगठित अपराध अनुसन्धान गर्ने सीआइबीले पछिल्लो समयमा कुनै पनि ठूला केसको अनुसन्धान गर्ननसकेको दोषको भारी बोकेको छ ।

आइजीपी खनालले पदभार ग्रहणपछि सीआइबीमा खटाइएका डीआइजी नारायणसिंह खड्काको कार्यक्षमता नदेखिएपछि निरजबहादुर शाहीलाई पठाए । उनले पनि सीआइबीमा कुनै क्षमता प्रदर्शन गर्न सकेनन् । १ महिनाअघि सीआइबीका डीआइजी शाहीले हावादारी मौखिक उजुरीका भरमा त्रिभुवन विश्वविद्यालय महाराजगंज मेडिसिन क्याम्पसमा परीक्षा दिइरहेका विद्यार्थीहरुको खानतलासी लिए । डीआइजीको नेतृत्वमा एक घन्टाभन्दा बढी समयसम्म भएको खानतलासीमा कुनै पनि सूचना अनुसार कैफियत नभेटिएपछि प्रहरी फर्किएको थियो ।

एमडीका विद्यार्थीहरु सहभागी भएको उक्त परीक्षामा हचुवाको भरमा खानतलासी लिइएको थियो । विदेशी विद्यार्थी समेत सहभागी परीक्षामा ५० औं जना प्रहरी ह्वारह्वार्ती खानतलासीमा गएका थिए । उक्त परीक्षामा कसैले नक्कली विद्यार्थी सहभागी भएको सूचना दिएको थियो । तर खानतलासीमा कोही पनि नक्कली विद्यार्थी फेला नपरेपछि प्रहरीको सूचना संयन्त्र कति हल्का रहेछ भन्ने टिप्पणी भएको थियो ।

सीआइबीमा शाहीले क्षमता देखाउन नसकेपछि आइजीपी खनाल पुनः नेतृत्व परिवर्तन गरी २ नम्बर प्रदेशका डीआइजी हरि पाललाई पठाउने पक्षमा देखिएका छन् । तर २ महिना शाहीलाई नै रोकेर हालै डीआइजी बढुवा भएका प्रहरी प्रवक्ता विश्वराज पोखरेल सीआइबीमा सरुवा हुने दाउमा रहेको प्रहरी स्रोत बताउछ ।

काठमाडौं परिसरमा ६ महिनाभन्दा बढी समय काम गर्न नपाएकाले उनी सीआइबीमा जाने र त्यहाँ काम देखाएर आफूभन्दा सिनियर डीआइजीहरुस“गै एआइजी बढुवाको बाटो पहिल्याउने सुरमा रहेको चर्चा पनि चलेको छ । भर्खरै प्रवक्ता भएकाले २ महिना जति प्रहरी प्रधान कार्यालयमा बसी त्यसपछि सीआइबीमा जाने तयारी डीआईजी पोख्रेलको रहेको चर्चा चलेको छ ।

२ नम्बर प्रदेशका डीआइजी पाललाई पठाउने पक्षमा आइजीपी खनाल देखिएपछि पोखरेल जसरी पनि २ महिना रोकेर त्यसपछि आफू जाने योजनामा लागेको बताइन्छ । पालले प्रधानमन्त्री केपी शर्मा ओलीलाई कन्भिन्स गर्न सके उनी सीआइबीमा आउनेछन् । प्रहरी स्रोत भन्छ, पालले प्रधानमन्त्रीमार्फत् जोडबल नगरे २ महिनापछि पोखरेल नै सीआइबीमा आउने पक्कापक्की जस्तै छ ।

१ नम्बर प्रदेशका डीआइजी केदार रिजाल महानगरीय आयुक्त कार्यालयमा आउन खोजिरहेका छन् । ३० बर्षे सेवाहदको प्रावधान हटाउने र भावी आइजीपी हुनका लागि पहल गर्न उनी काठमाडौंमा आउने दौडमा छन् । १ नम्बर प्रदेशमा ५ नम्बर प्रदेशका पिताम्बर अधिकारीलाई पठाउने पक्षमा गृह सचिव प्रेमकुमार राई समेत सकारात्मक रहेका छन् ।

इन्चार्जबाट इन्चार्ज दिएकोमा बिरोध नै भए पनि उनलाई १ नम्बर प्रदेशमा पठाउने संभावना छ । आइजीपी पनि उनीस“ग सकारात्मक नै रहेको स्रोत बताउछ । ३ नम्बर प्रदेशको डीआइजीमा पूर्णचन्द्र जोशीको नाम चर्चामा छ । प्रद्युम्न कार्कीलाई २ नम्बर वा ५ मा पठाउने तयारी रहेको गृहतिर चर्चा सुनिन्छ । साँघुन्यूजबाट